DILI, 05 Dezembru 2025 (TATOLI)–Primeiru-Ministru, Kay Rala Xanana Gusmão, sábadu (06/12) aban, sei dezloka ba Indonézia hodi diskute feze da-ruak kona-ba fronteira máritima ho nasaun viziñu referida.
Notísia Relevante: Negosiasaun fronteira TL-Indonézia iha Oekusi rezolve tuir akordu Olanda-Portugál
“Aban, ha’u sei viajen ba Jakarta Indonézia, tanba fronteira máritima ho Indonézia faze primeiru ita ko’alia ona iha fulan hira ba kotuk, faze da-ruak nian sira mak husu ita ba ko’alia iha Jakarta,” Xege Governu, Kay Rala Xanana Gusmão, hateten ba jornalista sira iha Palásiu Prezidensiál Nicolau Lobato, Bairru Pite, ohin.
Tuir Xanana, objetivu lolos diskute fronteira máritima ho Indonézia bainhira loos ona, bele fó biban ba Timor-Leste hodi halo kontrolu ba nia tasi no rikusoin sira.
“Importante mak ne’e, bainhira fronteira tasi loos ona, ita bele kontrola ita-nia tasi ho rikusoin sira,” nia dehan.
Nia hateten, diskusaun ho Indonézia ne’e kona-ba fronteira máritima maibé sei ko’alia mós kona-ba fronteira terrestre liuliu fronteira Naktuka.
“Ha’u dehan ona ba Prezidente katak, ha’u sei fó lembra nafatin no fó lembra ba ekipa delegasaun atu ko’alia ho Indonézia katak fronteira Naktuka seidauk finaliza maibé ita komprinde ho kalma. Iha Indonézia, ha’u sei fó lembra nafatin ba sira atu diskute hodi finaliza,” nia dehan.
Nia hatutan, sei ko’alia mós ba Governu Indonézia katak, foin lalais nia vizita ba Oekuse konsege to’o iha Naktuka no ko’alia ho komunidade iha ne’ebá oinsá atu nahe biti boot entre sira sorin ho sira Indonézia tanba mesak família.
“Entaun, sira informa mai ha’u katak iha loron 10 fulan-Dezembru mai, sira sei nahe biti boot entre parte rua hodi dame malu no rezolve probelama ne’ebé iha, nune’e fasilita Governu Indonézia atu konkorda ho ita hodi marka tuir akordu ne’ebé Portugál ho Olanda tau ona,” nia dehan .
Jornalista : Hortencio Sanchez
Editór : Cancio Ximenes
