DILI, 05 Dezembru 2025 (TATOLI)–Governu liuhusi Ministériu Solidariedade Sosiál no Inkluzaun (MSSI) no Institutu Nasionál Seguransa Sosiál (INSS) hamutuk ho Banku Nasionál Komersiu Timor-Leste (BNCTL-sigla portugeza) hahú ona halo pagamentu ba pensaun sosiál iha faze ikus tinan ne’e.
Prezidente Konsellu Administrasaun INSS, Arlindo Pinto hateten pensaun ikus ida-ne’e Governu aloka millaun $23 ba benefisiáriu hamutuk rihun 107.
“Agora ita tama ba faze ikus nian (dahaat) ba tinan ne’e, ne’ebé ita hahú ona pagamentu iha 24 Novembru no sei ramata iha 20 Dezembru ne’e,” Arlindo Pinto dehan ba jornalista sira iha resintu Komisaun Funsaun Públika (KFP), Matadouru, Sesta ne’e.
Arlindo Pinto dehan bainhira ramata tiha pagamentu faze ikus ne’e sei verifika sira-ne’ebé seidauk simu no balun ne’ebé mak moras.
Iha inísiu 2024, INSS halo pagamentu pensaun sosiál ne’ebé mak fahe ba kategoria tolu mak hanesan bazeia ba kategoria idade, mak idade 60-70 ho valór $60, idade 70-80 ho valór $80 no idade 80 ba leten ho nia valór $100. Enkuantu, totál orsamentu anuál ba 2025 hamutuk millaun $111.
Jornalista: Osória Marques
Editór: Xisto Freitas da Piedade
