DILI, 05 Dezembru 2025 (TATOLI)—Diretór Interinu Diresaun Jerál Ambiente, Augusto Soares, hateten komemorasaun loron internasionál voluntáriu liuliu iha asuntu ambiente nian ne’e, husu grupu voluntáriu sira atu mantein espíritu voluntarizmu hodi kontinua konserva ambiente ne’ebé saudável ba Timor-Leste.
Nia hateten, husi parte Ministériu Turizmu no Ambiente liuhusi Diresaun Jerál Ambiente, durante ne’e halo kooperasaun servisu ho estudante voluntáriu sira husi universidade inklui juventude sira-ne’ebé hamahon-an iha brigada ambientál halo divulgasaun informasaun kona-ba konservasaun ambientál ba sosiedade no eskola sira.
“Estudante sira-ne’e hala’o servisu ho voluntariamente hodi prevene ambiente saudável ba rai ida-ne’e liuhusi halo limpeza jerál no mós kuda ai-horis iha foho inklui kuda ai-parapa iha tasi laran,” nia informa ba Agência Tatoli iha nia kna’ar fatin, ohin.
Servisu voluntária ba ambientál aleinde servisu hamutuk ho juventude sira maibé sira mós servisu hamutuk ho autoridade lokál no edukasaun nian mak liuhusi programa eskola “verde” no suku “verde”.
Husi programa ne’e, nai dehan, sira halo sensibilizasaun kona-ba edukasaun ambientál ba estudante no manorin sira, entaun iha eskola 20-resin ona mak sira implementa programa ne’e iha territóriu tomak.
“Enkuantu kona-ba programa suku verde ami halo sensibilizasaun ambientál ba lideransa komunitária sira, juventude no komunidade seluk oinsá iha koñesementu atu konserva ambiente ne’ebé mak saudável, seguru no iha protesaun ba sosiedade nia moris,” nia dehan.
Grupu voluntáriu sira-ne’e kompostu de’it husi juventude no estudante universitáriu sira, enkuantu estudante sekundáriu sira laiha tanba sira sai nu’udar fonte prinsipál atu halo sosializasaun edukasaun ambientál ba sira.
Informasaun ne’ebé sira partilla mak kona-ba problema mudansa klimátika, konservasaun no proteje biodiversidade, kontrolu ba poluisaun, prevensaun ambientál no ekosistema.
Jornalista : Alexandra da Costa
Esitór : Cancio Ximenes
