PM Xanana atualiza servisu Governu ba Xefe Estadu
DILI, 05 Dezembru 2025 (TATOLI)–Primeiru-Ministru, Kay Rala Xanana Gusmão, sesta ne’e, hasoru malu ho Xefe Estadu José Ramos-Horta hodi atualiza servisu Governu nian durante ne’e mak Governu halo mak fó susesu ba selebrasaun tinan 50 Proklamasaun independénsia ne’ebé hala’o iha nasionál no munisípiu hotu ho susesu. .
Xefe Governu hateten, ba susesu hirak ne’e Governu hasai ona rezolusaun hodi apresia ba parte hotu ne’ebé kontribui maka’as hodi fó susesu ba selebrasaun ne’e.
“Informa ba Prezidente Repúblika katak, selebrasaun tinan 50 Proklamasaun Independensia la’o ho susesu. Ita hatene katak tinan 50 ne’e sei la akontese tan, ne’e mak Governu hasai ona rezolusaun ida hodi fó apresiasaun ba parte hotu ne’ebé fó susesu ba selebrasaun ne’e. Ha’u hala’o selebrasaun ne’e hala’o ho povu Oekusi, halo reflesaun ho sira oinsá ko’alia atu haree ba oin, nune’e sira bele kaer rasik sira-nia rai doben Oekusi,” Xanana hateten ba jornalista sira iha Palásiu Prezidensiál Nicolau Lobato, Bairru Pite .
Xefe Governu ne’e argumenta, durante selebra tinan 50 Proklamasaun Independénsia ho povu Oekusi sente kontente tanba Estadu la haluha sira no nafatin hamutuk ho povu rejiaun ne’e.
“Ha’u ba ne’e atu ko’alia ho sira tanba foin daudaun, ha’u forma estrutura ida urjente tebes, fó fulan tolu, no agora fó tan to’o 31 Dezembru. Ha’u ba iha ne’ebá ho ekipa ida, Komisaun Funsaun Públika, husi parte Ministériu Finansa, Ministériu Obra Públika, ba diskute ho Atoni-oan sira kona-ba estrutura ne’ebé presiza husu ba sira atu utiliza sira-nia kakutak rasik hodi halo dezenvolvimentu iha Oekusi,” Xanana dehan.
Alende ne’e, Primeiru-Ministru informa mós ba Xefe Estadu kona-ba Timor-Leste nia kontribuisaun ba ASEAN no Konsellu Mnistru iha semana kotuk halo ona aprovasaun ba dekretu-lei ida kona-ba regra ezekusaun Orsamentu Jerál Estadu (OJE) tinan 2026.
“Informa mós ba Prezidente kona-ba foin lalais Konsellu Ministru aprova ona dekretu-lei ida ba pagamentu désimu terseiru, iha problema uitoan, maibé ami sei buka atu rezolve. Ho mós ita-nia kontribuisaun ba ASEAN fó sai ona, aprova mós dekretu-lei ida ba ezekusaun orsamentu 2026,” Primeiru-Ministru hateten.
Iha parte seluk, Xefe Governu no Xefe Estadu ne’e ko’alia mós kona-ba iha fulan-Janeiru tinan 2026 ne’e, Primeiru-Ministru Australia sei vizita Timor-Leste hodi ko’alia no hametin kooperasaun bilaterál entre nasaun rua.
Jornalista : Hortencio Sanchez
Editór : Cancio Ximenes
