DILI, 05 Dezembru 2025 (TATOLI)–Prezidente Tribunál Rekursu, Afonso Carmona hateten, atu halo revizaun ba Konstituisaun ne’e depende ba vontade polítika husi membru Parlamentu Nasionál (PN).
“Atu halo revizaun Konstituisaun, tuir artigu 154 Parlamentu Nasionál mak iha kompeténsia. Tanba ne’e, atu halo revizaun ne’e tenke mai husi vontade Parlamentu,” Carmona hateten ba Jornalista sira iha Tribunál Judisiál Primeira Instánsia Dili (TJPID), Kaikoli, Sesta ne’e.
Tanba ne’e mak PN iha semana ne’e ho inisiativa realiza semináriu atu halo konsultasaun públika hodi rona ema hotu nia opiniaun liga ba revizaun Konstituisaun.
Notísia relevante : Revizaun ba Konstituisaun tenke iha konsensu alargadu
Prezidente Tribunál Rekursu dehan, órgaun judisiál ne’e nia kompeténsia mak atu garante povu nia legalidade no justisa ba ema hotu.
“Ha’u labele ko’alia tama to’o ba sira-nia poder, ha’u só hatene de’it mak oinsá kastigu ema no oinsá fó fali ema-nia direitu,” nia akresenta.
Carmona konsidera, PN nia inisiativa organiza semináriu ne’e nu’udar inísiu di’ak, nune’e ba oin hotu-hotu bele iha konsensu.
“Ho revizaun ne’e bele haree artigu sira ne’ebé iha Konstitusaun ne’ebé seidauk aplika iha ohin loron, bele halo revizaun no ba artigu ne’ebé konsidera la refleta ona situasaun ohin loron bele halo revizaun nune’e bele hapara situasaun ba ohin loron nian,” nia katak.
Jornalista : Natalino Costa
Editora : Julia Chatarina
