DILI, 05 Dezembru 2025 (TATOLI)—Eis Traballadór Talho Moris na’in-haat ne’ebé akompañadu husi Sindikatu Marítima Enérjia Transporte (SMET-TL) halo asaun greve hasoru empreza Talho Moris Dili, hodi ezije selu sira-nia saláriu ho justu.
Portavós Sindikatu Marítima Enérjia Transporte (SMET-TL), Nuno de Araújo, hateten ohin sira halo asaun greve ida hasoru empreza Talho Moris, tanba sira hapara traballadór sira lahó justu no la selu traballadór sira-nia saláriu.
“Ho razaun ne’e mak ohin ami hamutuk ho traballadór sira mai halo asaun greve hodi hetan sira-nia direitu, tanba traballadór hirak ne’e servisu tinan barak nia laran ona,” portavós ne’e informa ba jornalista sira, iha Bemori, ohin.
Maske antes ne’e halo diálogu ho empreza mós seidauk iha rezultadu, sira mós hato’o pedidu ba Sekretária Estadu Formasaun Profisionál no Empregu (SEFOPE) no inklui prosesu ne’e sira lori ba to’o arbitrajen maibé empreza lakohi koopera nafatin hodi selu traballadór sira-nia direitu.
“Banhira empreza la konsidera nafatin ami sei kontinua halo manifestasaun no lori kazu ne’e ba prosesa iha tribunál hodi hetan justisa,” nia hateten.
Reprezentante eis traballadór empreza Talho Moris, Gil Guterres, lamenta ho asaun ne’ebé mak durante ne’e empreza halo ba sira lahó justu tuir dalan legál tanba hasai sira husi servisu fatin no la selu saláriu tuir kontratu ne’ebé iha.
“Ha’u hahú servisu iha ne’e dezde tinan 2022, ne’e ami tama asina kontratu ho montante $125 kada fulan. Iha tinan 2023 ba oin patraun promete atu hasa’e ami-nia saláriu maibé la hasa’e to’o agora, maske ami servisu over time,” nia dehan.
Aleinde ne’e, bainhira sira hala’o servisu ba munisípiu sira lahetan perdiem maibé hetan de’it $20 hodi uza han hemu iha dalan, id- ne’e la justu tanba servisu ne’ebé sira hala’o iha munisípiu dalaruma liu tiha oras servisu hanesan baibain.
“Tanba ne’e mak ami hakarak ezije ami-nia direitu durante ne’e. Ami servisu hodi fó kontribuisaun ba empreza, maske simu sálariu ne’ebé la sufisiente hodi sustenta moris iha família nian,” nia hateten.
Jerente Empreza Talho Moris, Elísio da Costa, hateten asaun manifestasaun ida-ne’e ladi’ak no la’ós sai solusaun atu rezolve problema entre traballadór no empreza, satán sira lori fali sindikatu marítima mak mai halo manifestasaun maibé lolooss tenke lori mak KSTL.
“Ami hasai traballadór na’in-lima ne’e tanba dezempeñu servisu ladi’ak ka abandona servisu hanesan bainhira traballadór sira la tama servisu sein fó informasaun ba rekursu umanu no patraun, signifika ami konsidera falta ka latama servisu,” nia esplika.
Nia hatutan, iha traballadór balun mak servisu ho tinan naruk nia laran maibé dezempeñu servisu ladi’ak tenke hasai. Maske traballadór sira balun sira selu liu tiha kontratu ne’ebé iha tanba sira mós ho over time sira, enkuantu traballadór sira simu saláriu menus tanba dalaruma sira la tama servisu ne’e empreza tenke ko’a osan no selu bazeia ba oras.
“Ne’ebé di’ak-liu prosesa tuir lei. Ami prontu ba hatán iha tribunál no prontu selu bainhira empreza sala. Maibé atu dehan de’it katak ami iha evidénsia kompletu ba traballadór sira, ne’ebé atu lori ba tribunál mós ami la tauk ida,” bia dehan.
Nia énfaze empreza ne’e lokál la’ós internasionál, nune’e nafatin iha traballadór na’in-hitu (7) mak servisu iha ne’e, entaun hasai sira la fó impaktu ba empreza tanba ema barak mak sei buka hela servisu.
Jornalista : Alexandra da Costa
Editór : Cancio Ximenes
