DILI, 05 Dezembru 2025 (TATOLI)—Ministériu Obra Públika liuhusi Eletrisidade Timor-Leste, Empreza Públika (EDTL, E P) halo instalasaun sistema elétriku kabu subterráneu (husi rai-okos) hahú husi ponte BJ. Habibie to’o Bekora hodi garante kualidade no hamenus manutensaun.
Notísia Relevante: EDTL aprezenta orsamentu adisionál millaun $50 ba programa haat iha 2026
Ministru Obra Públika, Samuel Marçal, hateten instalasaun fiu eletrifikasaun iha rai-okos ne’e hanesan projetu pilotu ne’ebé ita foin hahú husi ponte BJ. Habibie to’o Bekora, maibé tuir orientasaun husi Primeiru-Ministru atu tinan oin mai kontinua aloka orsamentu ba faze daruak nian.
“Instalasaun fiu husi rai okos ne’e atu rezolve problema ahi mate, tanba tempu udan ne’e sempre mosu konslet iha fiu leten sira, entaun ita uza maneira seluk halo instalasaun husi rai okos, parte ida atu haree ninia estatístika sidade nian. Hanesan imi haree, fiu sira-ne’e dada rungu-ranga loos, entaun maneira ida-ne’e di’ak tebes atu hamenus mós orsamentu ba halo manutensaun. Durante ne’e ita-nia problema ahi mate mós tanba forsa enérjia ladun maka’as ka sa’e-tun, entaun ita presiza hadi’a nia kualidade,” Ministru Samuel informa ba jornalista sira iha nia kna’ar fatin, Kaikoli, ohin.
Nia dehan, bainhira instalasaun lina eletrifikasaun iha rai-okos ne’e ramata iha fulan-Marsu 2026 me’e garante 99% ahi sei la mate-lakan hanesan agora, tanba mundu tomak mós implementa sistema ida-ne’e.
Tanba ne’e, nia husu ba populasaun sira atu pasiénsia uitoan tanba buat hotu sei iha prosesu konstrusaun.
“Projetu pilotu dahuluk ne’e implementa husi empreza internasionál husi Xineza durante fulan neen ho montante millaun $4. Tinan oin, Governu liuhusi Ministériu Obrs Públika sei implementa projetu pilotu daruak nian iha parte seluk liuliu iha dalan protokolu,” nia dehan.
Jornalista : Alexandra da Costa
Esitór : Cancio Ximenes
