DILI, 05 Dezembru 2025 (TATOLI)—Primeiru-Ministru, Kay Rala Xanana Gusmão, akompañadu husi Ministru Obra Públika (MOP), Samuel Marçal, inaugura kampu multifunsaun “Xananai” iha Aldeia São Jose, Delta 4, Postu Administrativu Dom Aleixo, Munisípiu Dili.
Primeieru-Ministru, Kay Rala Xanana Gusmão mós husu ba joven sira atu tau matan ba kampu ne’e atu uza ba atividade desportivu ba ema hotu iha Delta 1, 2, 3 no 4, la’ós uza ba fatin treinu arte marsiál.
“Joven sira tenke hadomi malu no respeita malu ho dame, partida desportivu la’ós ba buka vitória maibé desportu fó ita hatene malu,” PM Xanana Gusmão hateten iha serimónia inaugurasaun kampu multifunsaun ne’e iha Delta 4 Komoro, kinta (04 Dezembru 2025) ne’e.
Ministru Obra Públika, Samuel Marçal, hateten objetivu prinsipál konstrui kampu ne’e mak atu harii dame no unidade entre ema, liuhusi atividade desportivu sira bele fó diversaun ne’ebé junta ema.
“Ohin loron, inaugura kampu ne’e nu’udar fasilidade ida atu fortalese dame no unidade iha knua ne’e no ne’e la’ós de’it ba Delta 4, maibé Delta 1, 2 no Delta 3 hotu bele uza kampu ne’e,” Ministru Samuel hateten iha serimónia inaugurasaun kampu multifunsaun ne’e iha Delta 4 Komoro, kinta (04 Dezembru 2025) ne’e.
Tanba ne’e, nia husu ba joven sira atu tau matan ba kampu ne’e hodi nafatin iha kondisaun di’ak, nune’e bele uza to’o tempu naruk.
“Kampu multifunsaun ne’e bele uza ba atividade desportivu hanesan futsal, badminton, basketból, Volleiból no selu-seluk tan inklui se iha konsertu ki’ik bele uza kampu ne’e tanba bele fó divertimentu ba ema iha knua ne’e,” nia dehan.
Aleinde ne’e, nia husu ba komunidade iha aldeia ne’e atu harii grupu estrutura ida hodi tau matan ba kampu ne’e, tanba osan ne’ebé aloka ba konstrusaun kampu ne’e besik rihun $300, ne’ebé mak halo husi empreza lokál, iha ne’ebé konstrui besik fulan haat to’o lima de’it.
Iha fatin hanesan, Xefe Aldeia Jose Mucasana hato’o nia agradesementu ba Governu Konstitusionál da-sia (IX) liuhusi Primeiru-Ministru no Ministru Obra Públika (MOP) ba konstrusaun kampu ne’e ba estabilidade ema iha aldeia
“Ha’u nu’udár autoridade, xefe knua iha ne’e, lori ema hotu nia naran, hato’o agradese boot no joven sira hotu iha ne’e hato’o obrigadu ba PM Xanana no Ministru MOP,” líder komunitáriu ne’e informa.
Prezidente Institutu Geosiénsia Timor-Leste (IGTL, sigla protugés), Job Brites dos Santos, hateten naran kampu “Xananai” husi fosil foun ne’ebé deskobre iha TL, tanba Governu fó naran kampu ne’e ‘Xananai’ atu hahoris ba deskoverta fosil foun husi peskiza IGTL nian.
Kampu multifunsaun nia naran ‘Xananai’ foti husi Primeiru-Ministru Kay Rala Xanana Gusmão nia naran, tanba tuir IGTL Xanana mak figura ne’ebé kontribui maka’as ba libertasaun no estabilidade povu TL.
“Iha tinan hirak liuba, ami servu hamutuk ho University of Western Austrália, geologia ami estudu iha área Manatutu li’ur iha área ne’ebé kohe ho naran pualaka, nune’e ho okaziaun ne’e ami halo peskiza kona-ba sedimentu, nune’e atu hatene sedimentu ami tenke ka’er fosil ba analiza. Iha analiza fosil ne’e, ami hetan fosil foun, la’ós iha mundu de’it maibé iha Timor, nune’e ho inisiativa ami nian rasik, atu respeita Primeiru-Ministru ami nian, nune’e fosil ne’e ami deside atu naran XANANAI, atu respeita dedikasaun no kontribuisaun PM ami-nian ba nasaun ne’e,” dirijente ne’e esplika.
Nia dehan, IGTL mós sei halo plaka ida atu hatama iha kampu ne’e, nu’udar informasaun edukasaun ba vizitante no ema iha knua ne’e atu hatene saida mak fosil “Xananai”.
“Fosil ne’e agora foin publikasaun iha jornál internasionál, ne’ebé rejista iha literatura sientista internasionál, nune’e ema ruma ne’ebé hetan fosil hanesan iha nasaun ruma, labele muda naran fosil ne’e,” nia dehan.
Institutu Geosiénsia Timor-Leste (IGTL) mós haksolok no orgullu ba Governu li’ur iha MOP atu naran kampu multifunsaun “Xananai” ne’ebé akuza kontribuisaun husi IGTL.
Jornalista : Alexandra da Costa
Editór : Cancio Ximenes
