DILI, 05 Dezembru 2025 (TATOLI)–Primeiru-Ministru, Kay Rala Xanana Gusmão, hateten nia parte halo intervensaun hasoru Lotaria Grand Dragon ne’e la’ós polítika maibé nu’udar Xefe Governu.
Notísia Relevante: MP autoriza PNTL detein suspeitu na’in-tolu husi Lotaria Grand Dragon
“Intervensaun ha’u halo ba Lotária Grand Dragon ne’e la’ós polítika. Intervensaun polítika sim, mais la’ós partidu, ha’u Xefe Governu. Iha Parlamentu diskusaun Orsamentu Jerál Estadu (OJE) deputadu barak kestiona kona-ba jogu online sira, dehan ha’u mak autoriza, dehan hasai ona rezolusaun mais ema sei joga nafatin, ne’e mak ha’u tun hodi halo intervensaun,” Xanana hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, bainhira halo intervensaun konsege hetan evidensia lubuk ida no sei kontinua prosesu ba oin.
“Ita hetan hotu, dadus kompletu, ida ne’e hetan 50%, ida-ne’e 20%, ida ne’ebá 10%, ita iha dadus hotu, sira ligasaun ho Indonézia, ligasaun ho Brazíl, ho Europa. Buat ne’e atnes ha’u ba ne’e Polísia ba ona, intelijensia sira iha ha’u-nia okos. Ita deteta katak hanesan telemovel karik sira hasai de’it mak nia kartaun, pois tau fali kartaun foun, entaun ha’u to’o orienta Polísia tenke hasai ida-ne’e, ne’ebé la’ós intervensaun polítika maibé nudar Xefe Governu,” nia dehan.
Primeiru-Ministru, Xanana Gusmão, halo intervensaun hasoru Lotaria Grand Dragon iha Dili, Timor-Leste, iha loron 04 fulan-dezembru tinan 2025 hodi taka lotaria ne’ebé lokaliza iha Pantai Kelapa Dili inklui sukursál iha Timor Plaza.
PM Gusmão afirma katak, nia responsável ba Seguransa Nasionál no Polísia Investigasaun no Vijilánsia (PSIK), katak nia foti inisiativa hodi taka jogu online ne’e tanba preokupasaun públiku kona-ba lakon finanseiru.
Intervensaun direta ida-ne’e hasoru Lotaria Grand Dragon ne’e hatudu kompromisu Primeiru-Ministru nian ba seguransa no bem-estar sosiál populasaun nian.
Jornalista : Hortencio Sanchez
Editór : Cancio Ximenes
