DILI, 04 Dezembru 2025 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál (DSIKN), iha Kuarta (03/12) halo ona detensaun ba suspeitu na’in-tolu ne’ebé nu’udar jerente másimu ba Lotaria Grand Dragon, ne’ebé lokaliza iha Praia dos Coqueiros, inklui mós sukursál iha Timor Plaza tanba dezobedénsia ba rezolusaun Governu hodi kontinua halo jogu online.
Asaun ne’e bazeia ba mandadu husi Tribunál Judisiál Primeira Instánsia Dili (TJPID) ho mandadu judisiál ho Númeru Úniku Kriminál (NUC) 0389/2025 PNSIC.
Nune’e, liuhusi buska no apreeensaun ne’ebé ekipa halo konsege identifika no halo detensaun ba suspeitu na’in-tolu ho fora husi fraglante delitu, tuir artigu 220 husi Kódigu Prosesu Penál Timor-Leste no bazeia ba Ministeriu Públiku (MP), Prokuradór Titulár João Marques
Portavós Komandu PNTL, Superintendente Polísia João Belo dos Reis informa, mandadu husi MP husu halo buska no apreensaun ba jogu online sira ne’ebé mak la kumpre rezolusaun Governu nian.
“Horisehik, ita halo intervensaun ba jogu dragon ninian, ohin kontinua ita halo apreensaun ba objetu balun ne’ebé liga ba sira-nia atividade no ita sei aprezenta ba Ministériu Publiku, tarde liu aban (05/12) lorokraik atu prosesa ba Tribunál,” João Belo hato’o ba jornalista sira iha sala Konferénsia Imprensa, Ministériu Interiór, Vila-Verde, Kinta ne’e.
Notísia relevante : Tribunál aplika medida koasaun tolu ba arguidu na’in-10 suspeitu ba jogu online
Nia dehan, hafoin buska no apreensaun iha fatin rua, ekipa konsege foti deklarasaun husi ema na’in-15, ne’ebé nu’udar traballadór inklui asegura objetu balun ba investigasaun.
Komandante Belo afirma, Rezolusaun Governu bandu ona operasaun jogus online sira, tanba ne’e sé de’it mak la kumpre mak sei ba hatán iha Tribunál.
“Rezolusaun Governu nian ne’e bandu kona-ba jogu online sira hotu tenke taka. Tanba Rezolusaun ne’e termina ona kualker jogu online iha públiku konsidera ilegal. Karik kompañia sira ne’ebé afetadu ba operasaun ida-ne’e sira iha direitu atu ko’alia iha Tribunál,” nia tenik.
Nia hatutan : “Ami hala’o serbisu tuir saida mak ami iha. Mandadu husi Ministériu Públiku husu atu halo buska no apreensaun ba kompañia sira ne’ebé mak aplika jogu online.”
Diretór Servisu Investigasaun Kriminál Nasionál ne’e dehan, polísia sei halo operasaun ba kompañia Amizade ne’ebé mak molok ne’e halo jogu online.
“Orientasaun ne’ebé mak mai husi Ministériu Publiku ba sira hotu ne’ebé mak konsidera aplika jogu online mak operasaun sei la’o, ami hetan orientasaun no ami kumpre ezekuta,” nia tenik.
Jornalista : Natalino Costa
Editora : Julia Chatarina
