DILI,13 Outubru 2025 (TATOLI)–Tribunál Judisiál Primeira Instánsia Dili (TJPID), Segunda ne’e, liuhusi Juíza Turnu, Ana Paula Fonnseca liuhusi nia despaisu, aplika medida koasaun tolu ba arguidu nain-10 ne’ebé antes ne’e suspeitadu ba krime jogu no scam online.
Medida koasaun tolu mak hanesan aprezentsaun períodika, provizaun auzénsia no medida koasaun kausaun.
Liuhusi primeira interrogatóriu ba kazu ne’e, Ministeriu Públiku (MP) ne’ebé reprezenta husi Prokuradór Rafael Gusmão, promove arguidu sira ho krime tolu mak hanesan brankamentu ne’ebé previstu iha artigu 313, krime organizadu husi artigu 320 no jogu online artigu 322 husi Kódigu Penál Timor-Leste.
Notísia relevante : PNTL detein sidadaun na’in-10 iha Jita Plaza no Kolmera relasiona jogu online
Iha alegasaun MP alega arguidu sira ho prizaun preventiva tanba arguidu sira iha indísiu komete krime ne’ebé MP promove ba arguidu sira.
Maibé, parte Defeza husi arguidu sira, Advogadu Privadu Napoleão de Oliveira Carvalho, husu ba Tribunál atu aplika medida koasaun aprezentasaun períodika semana ida dala-rua.
Hafoin Tribunál rona tiha parte hotu, Tribunál liuhusi Juíza Turnu Ana Paula Fonseca hasai despaisu hodi aplika medida koasaun aprezentasaun períodika ba arguidu na’in-10 ne’e inklui aplika mós medida koasaun proibisaun auzénsia hodi bandu arguidu sira labele sai husi terróriu nasionál.
Iha despaisu Tribunál ne’e mós aplika medida koasaun kausaun hodi husu ba arguidu na’in-10, kada ema $1.000 nune’e arguidu na’in-10 ne’e iha obrigsaun selu kausaun ba Estadu $10.000.
Defeza Arguido sira, Napoleão hateten, despaisu Tribunál ne’ebé ohin aplika ba ninian asistidu na’in-10 ne’e Tribunál aplika iha medida tolu.
Liuhusi desizaun Tribunál nia ne’e aplika mós proibisaun auzénsia, tanba arguidu sira nu’udar sidadaun estrajeiru. Tanba ne’e liuhusi desizaun Tribunál ne’e, labele sai husi Timor-Leste no medida koasaun aprezentasaun períodika kada semana dala-rua iha segunda no kinta arguidu sira tenke ba aprezenta aan iha MP iha tuku 14:00.
Defeza esplika, kausaun ne’ebé Tribunál aplika ba nia kliente na’in-10 ne’e, hanesan garantia ba prosesu, tanba arguidu sira ne’e ema estrajeiru, entaun kuandu sira halai husi ne’e, entaun osan ne’e tenke hela ba Estadu.
Nia dehan, osan ne’e atu asegura prosesu ne’e ninian andamentu ne’e kontinua.
“Desizaun Tribunál nian nee ita labele dehan adekuadu ou ita labele dehan justu, justu ba ida-ne’ebé mak simu, la justu ba ida-ne’ebé mak la simu,” Napoleão katak.
Jornalista : Natalino Costa
Editora : Julia Chatarina
