DILI, 06 Dezembru 2025 (TATOLI)—Fundasaun Alola, sabadu ne’e, realiza feira natál ka feira anuál hodi konvida grupu artezanatu sira husi munisípiu 12 inklui Rejiaun Administrasaun Espesiál Oekusi Ambeno (RAEOA) hodi promove no faan sira-nai produtu.
Feira natál ne’e rasik hala’o loron rua hahú ohin no aban (07/12).
Diretora Fundasaun Alola, Maria Imaculada Guterres, hateten feira natál referida organiza kada tinan fó oportunidade Ba grupu sira hodi bele promove sira-nia produtu.
“Objetivu husi ita-nia feira ne’e parte ida husi ami-nia programa hakbiit ekonomia feto entaun ita hakarak ajuda ita-nia grupu sira bele mai promove no fa’an sira-nia produtu, hanesan artezanatu,Tais no seluktan,” Maria Imaculada Guterres, ba Tatoli, iha Maskarinas, Dili, ohin.
Tuir nia, feira natál ne’e rasik hahú dezde 2007 to’o agora, tinan ne’e konvida grupu 50 mak mai partisipa. No totál orsamentu ne’ebé prevee realiza ba feira ne’e hamutuk $1.500 resin, orsamentu ne’e hetan apoiu husi Embaixada Tailándia no Sekretáriu Estadu Arte no Kultura (SEAK).
Iha fatin hanesan, Vendedór husi Grupu Haburas Kultura (Estatua), Eliseu da Costa, sente kontente tanbs bele partisipa iha feira natál ne’e hodi promove no fa’an produtu ne’ebé sira halo.
Vendedór ne’e dehan, produtu ne’ebé sira halo husi Ataúro hotu, no materiál prima ne’ebé sira uza ba produtu ne’e mai husi Ataúro hotu, tanba ai ne’ebé uza halo estátua ne’e sira na’in rasik mak kuda hanesan aina, ai-sare no seluktan.
“Produtu ne’ebé ami halo mai fa’an iha feira mak hanesan artezenatu, ami halo tipu oioin hanesan Lafaek, estátua, prezépiu no seluk, ami fa’an folin hahú husi $2 to’o $350,” nia dehan.
Enkuantu membru Haburas Kultura rasik eziste iha tinan-2000 daudaun iha ona membru hamutuk na’in-neen, no durante ne’e hetan ona oportunidade ba partisipa iha feira iha rai-li’ur hanesan Xina, Makau no seluktan.
Jornalista : Arminda Fonseca
Editór: Rafael Ximenes de A. Belo
