DILI, 06 Dezembru 2025 (TATOLI) — Prezidente Institutu Nasionál Seguransa Sosiál (INSS), Arlindo Pinto informa traballadór hosi entidade hotu-hotu hamutuk rihun 30-resin mak asesu ona programa Mobile App.
“Traballadór 30.000-resin mak asesu ona ba Mobile Aap. Foin daudaun halo manutensaun hodi ita-nia ekipa Cyber Security halo analiza hodi evita nia risku sira-ne’ebé hosi entidade balun ataka. Nune’e manutensaun ne’e ita deskansa uituan kuaze semana ida no daudaun ne’e ativu ona,” Arlindo Pinto hateten ba jornalista iha resintu Komisaun Funsaun Públika (KFP), Matadouru, Dili, Sábadu ne’e.
Nune’e biban ne’e hakarak atu alerta mós públiku katak daudaun ne’e Mobile Aap ne’ebé lansa ne’e asesu ona iha play store sistema Mobile Android nian. Agora faze teste ba IOS (Google Android Apple’s iOS).
“Espera semana oin, parte sentrál sira halo premisaun entaun ita bele fó ba públiku ona no ba entidade sira-ne’ebé uza Mobile Iphone ne’e bele download kona-ba sistema Mobile App ne’e,” nia esplika.
Fundu Rezerva Seguransa Sosiál atinje ona millaun $279
Tuir Prezidente INSS katak to’o fulan-Outubru ne’e Fundu Rezerva Seguransa Sosiál ninia atinjimentu millaun $279 ona.
“Fundu kontributivu iha INSS to’o fulan-Outubru hamutuk millaun $279 ne’ebé durante ita kapitaliza iha Fundu investimentu ka Fundu protokolu nian. Ita hatene katak ita-nia projesaun iha Dezembru tinan ne’e nia rohan ita-nia kapitaliza sei sai to’o millaun $305. Tanba daudaun ne’e halo levantamentu ba reseita sira ne’ebé hosi Fundu kontributivu iha Ministériu Finansa,” nia dehan.
Arlindo Pinto akresenta, kuandu sira haruka hotu mai seguransa sosiál signifika hosi ne’e sei akumula mós rendimentu husi investimentu sira inklui reseita no dívida sira-ne’ebé mak konstribui hosi setór privadu no setór publiku.
“Entaun hosi ne’e ita projeta katak atinjimentu millaun $350, iha tinan ne’e sei to’o ne’ebá,” Arlindo haktuir.
Tuir dadus, kontribuente hosi setór privadu no setór publiku hamutuk rihun 160.
Jornalista : Osória Marques
Editór : Rafael Ximenes de A. Belo
