DILI, 05 Dezembru 2025 (TATOLI)—Ekipa futeból femininu Vale de Lahane (VDL) kontinua derrota iha primeira divizaun Liga Futeból Femininu Timor-Leste (LFFTL) bainhira kontra Maranatha Football Club iha jogu jornada dahitu.
VDL FC ne’ebé to’o jornada daneen iha pozisaun daualu iha tabela klasifikasaun primeira divizaun obrigadu tenke simu realidade ida-ne’e (derrora) kontra Maranatha FC ne’ebé kategoria ekipa forte ho skor 0-10.
Jogu ne’ebé hala’o iha Estádiu Munisipál Dili, Kinta (04/12/2025) ne’e, iha parte dahuluk ramata ho skor 0-4 iha-ne’ebé prodús husi jogadora sira hanesan Rafa Rina iha minutu 21, Ratri Titania 28 no golu rua husi Eugénia Lopes iha minutu 33 no 44.
Notísia relevante: Na’in-Feto kontra VDL FC ramata ho impata
Enkuantu, parte daruak Maranatha kontinua aumenta golu neen ne’ebé enxe liuhusi jogadora Rosalina Wenda iha minutu 58, 90+3, Nofa Sofi minutu 70, 85, Rafa Rina 81 no Eugénia Lopes aumenta golu iha iha minutu 90+1.
Ho rezultadu jogu entre ekipa rua, Maranatha FC rekolla pontu 11 no mantein iha pozisaun dalimak iha tabela klasifikasaun, enkuantu VDL kontinua iha pozisaun daualu ho pontu haat (4), rezultadu manán ida (1), impata ida (1) no derrota lima (5).
Jornalista: Natalino Belo
Editór: Xisto Freitas da Piedade
