Timor-Leste asume prezidénsia Grupu LDCs ba períodu 2026-2028
DILI, 04 Dezembru 2025 (TATOLI) – Ministru Negósiu Estranjeiru no Kooperasaun (MNEK), Bendito Freitas, hateten Timor-Leste sente orgullu hodi asume prezidénsia Grupu Nasaun Menus Dezenvolvidu (LDCs, sigla inglés) ba períodu 2026-2028, ne’ebé sei ofisializa iha tinan oin.
“Iha Janeiru [2026 ekipa] mai 20-resin husi nasaun sira ne’e hodi formal hand over [iha Timor-Leste]. Ita tenke orgullu ba Timór, neineik ba nafatin”, nia informa iha Parlamentu Nasionál, ohin.
Lembra katak Timor-Leste marka tan momentu istóriku ida iha palku mundiál bainhira ofisialmente simu Prezidénsia LDCs durante plenáriu koordenasaun LDCs iha COP30 iha Belém, Brazíl.
Entrega kargu ne’e akontese iha 17 Novembru 2025, ho Embaixadór Adão Soares Barbosa ne’ebé sei asume knaar nu’udar Prezidente ba Grupu LDCs iha Konvensaun Kuadru Nasaun Unida (UNFCCC) nia okos ba períodu 2026-2028.
Timor-Leste sei formalmente hahú kargu prezidénsia ida-ne’e iha Janeiru 2026. Marku ida-ne’e tau Timor-Leste iha liña oin diplomásia klimátika globál nian iha nivel Organizasaun Nasaun Unida (ONU), hodi lidera no reprezenta nasaun LDCs hamutuk 44 ne’ebé vulneravel liu ba mudansa klimátika iha mundu, iha negosiasaun klimátika internasionál nian.
Prezidente LDCs nia papél mak lidera grupu ida-ne’e hodi halo negosiasaun klimátika iha UNFCCC nia okos, responsavel ba koordenasaun estratéjia negosiasaun, aprezenta pozisaun unifikadu kona-ba adaptasaun, finansiamentu klimátiku, lakon no estragu, transferénsia teknolójia, kapasitasaun, no asegura katak prioridade LDC nian reflete iha desizaun klimátika globál sira.
Embaixadór Adão Barbosa iha esperiénsia besik dékada rua iha negosiasaun UNFCCC nian. Agora nia hala’o knaar nu’udar Enviadu Espesiál no Embaixadór-Jerál ba Asuntu Klimátiku.
Iha tinan barak nia laran, nia hala’o ona knaar xave sira nu’udar koordenadór LDC ba lakon no estragu, Prezidente Grupu Peritu LDCs UNFCCC nian, membru Konsellu Fundu Lakon no Estragu, eis-membru Komité Ezekutivu husi Mekanizmu Internasionál Varsóvia (WIM) nian no eis-membru Konsellu Fundu Adaptasaun. Ninia lideransa no matenek hetan rekoñesimentu iha komunidade klimátika globál.
Durante serimónia entrega, Prezidente atuál Evans Njewa husi nasaun Malawi hetan agradesimentu ba nia serbisu dedikadu iha Grupu LDCs, enkuantu Embaixadór Adão espresa Timor-Leste nia kompromisu atu lidera ho integridade no determinasaun, hodi destaka nesesidade urjente ba asaun ida-ne’ebé forte liu kona-ba adaptasaun, finansiamentu klimátiku, lakon no estragu, kapasitasaun no tranzisaun justu, nune’e laiha nasaun ida mak hela iha kotuk.
Ho COP30 ne’ebé mak hala’o iha Belém, Brazíl – iha rejiaun Amazónia nia laran – tranzisaun ida-ne’e mosu iha momentu importante ida bainhira mundu prepara ba desizaun implementasaun boot sira tuir Akordu Paris nian.
Lideransa Timor-Leste ba Grupu LDCs la’ós de’it eleva nasaun nia lian iha palku klimátiku globál, maibé mós hametin kapasidade nasionál iha diplomásia klimátika nian no loke oportunidade foun ba peritu, juventude no instituisaun timoroan sira atu kontribui ba asaun klimátika globál.
Rezultadu ida-ne’e sai nu’udar momentu orgullu boot ida ba povu Timor-Leste no reforsa nasaun nia papél no responsabilidade ne’ebé buras daudaun hodi avansa justisa klimátika no reziliénsia ba nasaun sira ne’ebé vulneravel liu iha mundu.
Jornalista: Nelson de Sousa
Editora: Maria Auxiliadora
