DILI,06 Dezembru 2025 (TATOLI)-Tribunál Judisiál Primeira Instánsia Dili (TJPID), sábadu, ne’e halo interrogatóriu ba arguidu na’in-tolu ho inisiál NGT, VJ, MFDPM ne’ebé molok ne’e autoridade seguransa detein tanba suspeitadu loke jogu ilísitu online iha jogu lotaria Grand Dragon, kuarta (03/12) foin lalais ne’e.
Durante prosesu interrogatóriu dahuluk ba arguidu na’in-tolu ne’e, Ministériu Públiku ne’ebé reprezenta husi Prokuradór Rafael Gusmão no João Marques promove arguidu sira ho krime explorasaun jogu ilísitu artigu 322 no brankamentu kapitál artigu 313 ne’ebé previstu no punidu iha Kódigu Penál Timor-Leste.
Iha prosesu interrogatóriu dahuluk ne’e arguidu na’in tolu: NGT, VJ no MFDPM, hili direitu nonok.
Iha interrogatóriu dahuluk Ministériu Públiku liuhusi Prokuradór Rafael Gusmão no João Marques solisita ba Tribunál atu aplika medida Prebuisaun Aujénsia no medida koasaun kausaun ho valór osan $10.0000 bá arguidu sira, tanba konsidera prátika krime jogu ilísitu ba online no krime brankamentu kapitál.
Hatan ba alegasaun ne’e, defeza husi arguidu na’in-tolu Advogadu Privadu José Ximenes husu Tribunál atu aplika Termu Identidade Rezidénsia (TIR) ba arguidu sira tanba jogu Lotaria Grand Dragon legál, no iha dokumentu lisensa sei moris hela, no selu taxa bá Estadu.
Hafoin Tribunál rona tiha parte hotu Tribunál liuhusi Juiza turnu Zulmira Auxiladora aplika medida koasaun Aprezentassun Periódiks kada semana dala ida iha Ministériu Públiku Kolmera.
Jornalista: Natalino Costa
Editór: Rafael Ximenes de A. Belo
