VIKEKE, 07 Dezembru 2025 (TATOLI) –Autoridade Postu administrativu Uatulari, munisípiu Vikeke hamutuk veteranu sira, domingu ne’e, halo abertura ba jogu futeból kopa Sabika Besi Kulit (SBK) hodi komemora loron 7 dezembru, loron invazaun Indonézia mai Timor-Leste.
Reprezentante prezidente komisaun organizadora kopa SBK, João Lemos, informa katak realizasaun kopa SBK ida-ne’e ho objetivu atu komemora 7 dezembru 1975.
“Tanba ne’e, ohin ami halo abertura jogu referidu iha loron 7 Dezembru. Loron ida-ne’e sai loron istóriku ba ita Timór. Nune’e inisiativa loke jogu ne’e mai husi maijór jenerál F-FDTL, Sabika Besi Kulit, kontribui Uatulari oan sira hodi realiza jogu futeból ne’e hodi anima mós ita-nia komunidade sira”, João Lemos ba jornalista sira, iha kampu futeból, suku Afaloikai, ohin.
João hatutan, jogu futeból SBK ne’e hetan apoia fundu mai husi Uatulari-oan sira-ne’ebé hela ih Dili no iha Uatulari ho orsamentu totál hamutuk $ 3,000-resin.
“Jogu futeból ne’e klube mai husi suku ualu, kada suku ida reprezenta klubu A no B, balun klube ida iha postu Uatulari inklui suku Uma Uain Leten klube ida husi postu Vikeke Vila ho totál klube hamutuk 13 mak partisipa jogu. Kona-ba prémiu, ami labele fó sai, depois jogu finál mak ami foin bele fó sai ba públiku,” nia hato’o.
Iha fatin hanesan, Reprezentante Maijór jenerál Falintil Forsa Defeza Timor-Leste (F-FDTL), Sabika Bisi Kulit, reprezenta husi Tenente Klonel F-FDTL, Julio Pinto, husu jogadór sira-ne’ebé partisipa kopa SBK tenke respeita regra no respeita malu hodi kria unidade no amizade iha postu administrativu Uatulari.
“Ha’u fó hanoin mós ba treinadór sira katak imi fó treina jogadór sira kona-ba fíziku no tékniku, la’ós halo anarkizmu hodi tebe malu. Nune’e mós ha’u husu ba jogadór sira kumpri regra sira-ne’ebé komisaun prepara ona no tenke jogu ho di’ak. Ba jogu ne’e ensera jenerál Sabika Besi Kulit sei marka prezensa hodi asiste direta jogu finál,” nia realsa.
Iha biban ne’e, Administradór postu Uatulari, Jorge Ribeiro, dehan, kona-ba jogu ne’e insiativa husi Maijór jenerál Falintil Forsa Defeza Timor-Leste (F-FDTL), Sabika Bisi Kulit no nia rasik mak fó apoia realizasaun futeból.
“Tanba ne’e ha’u husu jogadór sira tenke kontribui ba jogu futeból ida-ne’e hodi tane aas ita-nia jenerál nian naran. Ita-nia jenerál ema rezisténsia nian ne’ebé tenke asegura jogu futeból SBK ida-ne’e to’o ramata”, nia apela.
Entretantu, abertura jogu futeból kopa SBK ne’e klube A husi suku Matahoi hasoru klube Makadike de Cima, iha jogu abertura ne’e klube A husi suku Matahoi manán golu (3), klube A husi Makadike de Cima golu (1). Jogu futeból SBK abertura domingu ne’e sei ramata iha loron 27 fulan-Dezembru 2025.
Partisipa abertura jogu futeból SBK ne’e mak autoridade lokál, veteranu, komandante Polísia Nasionál Timor-Leste (PNTL) eskuadra Uatulari, inklui komunidade Uatulari.
Jornalista : Vitorino Lopes da Costa
Editór : Rafael Ximenes de A. Belo
