DILI, 07 Dezembru 2025 (TATOLI) – Prezidénsia Repúblika, José Ramos-Horta, iha kolaborasaun ho Ministériu relevante sira husi IX Governu Konstitusionál no Munisípiu Likisá, sai uma-na’in ba semináriu ida ho títulu “Unidade Nasionál Garante Sustentabilidade Estadu no Nasaun nian.”
Eventu ida-ne’e halo parte iha siklu refletivu ida-ne’ebé marka aniversáriu ba dala-50 invazaun nian.
Sorumutu loron rua ne’e hala’o iha aldeia Vatuboro, Loes, Munisípiu Likisá, fatin ne’ebé iha signifikadu istóriku ne’ebé kle’an.
Husi tinan 1975 to’o 1979, baze rezisténsia Fronteira Norte iha Loes kompostu husi kompañia xave haat: Kompañia Bubu Api iha Vatuboro, Kompañia Tata Bei iha Gugleur, Kompañia Manus iha Guiço, Kompañia Magarapo iha Lisadilla, no Kompañia Ramhana iha Tatabei.
Kompañia Ramhana notavelmente inklui membru sira husi Manatutu, Baukau, Lospalos, no Vikeke.
Eventu reflesaun ne’e halibur memória solene ho atividade kulturál hodi hametin ligasaun komunidade no espíritu reziliénsia nasionál.
Loron dahuluk, 6 Dezembru, foka liubá komunidade no komemorasaun. Atividade sira inklui seremónia kuda ai-oan, Santa Missa hodi hanoin hikas Herói Nasionál sira, no kompetisaun desportu tradisionál. Loron ne’e konklui ho divertimentu muzikál ne’ebé selebra kultura timoroan no memória koletiva.
Loron 7 Dezembru dedika ba reflesaun kle’an kona-ba nasaun nia pasadu no futuru. Prezidente Ramos-Horta prezide sesaun abertura, hodi subliña legadu duradoura luta nian.
“Ita-nia unidade harii liuhusi sakrifísiu komún. Ida-ne’e mak fundasaun sólidu ba sustentabilidade ita-nia Estadu no futuru prósperu ita-nia Nasaun,” Ramos-Horta hateten liuhusi nota ne’ebé Tatoli asesu husi media gabinete Palásiu Prezidensiál Dili, ohin.
Konsellu Munisipál Kombatente Libertasaun Nasionál (CMCLN) Likisá aprezenta eis komandante no kombatente sira husi kompañia Bubu Api, Tata-Bei, Manus, no Lisadilla. Loron ne’e mós fó atensaun ba solidariedade komunitária, ho distribuisaun parsela Natál ba família 150 husi suku tolu iha Loes, Munisípiu Likisá
Iha kalan sei fó sai dokumentáriu istóriku tinan-1975 nian husi Arkivu no Muzeu Rezisténsia Timorense (AMRT), no ramata ho konsertu.
Reflesaun ba aniversáriu 50 ne’e hanesan omenajen ida ba pasadu no kompromisu foun ida ba futuru ida ne’ebé unidu.
TATOLI
