DILI, 09 Dezembru 2025 (TATOLI)—Ekipa futeból femininu AD SLB Laulara kontinua mantein iha pozisaun dahuluk, enkuantu Maudoko Football Club derrota ho S’amuser iha jornada dahitu primeira divizaun Liga Futeból Femininu Timor-Leste (LFFTL).
AD SLB iha jogu jornada dahitu gaña vitória hafoin manán ekipa forte seluk, Buibere FC ho skor 1-3 iha-ne’ebé hala’o iha Estádiu Munisipál Dili, Domingu (07/12/2025).
Golu tolu referidu prodús husi AD SLB liuhusi jogadora sira hanesan Milena Saldanha iha minutu 27, Elvira da Silva 49 no Maria Conceição iha minutu 76, enkuantu Buibere FC ne’ebé to’o jornada daneen iha pozisaun daruak (2) obrigadu tenke lakon pontu maski jogadora Deonísia Silva enxe golu iha minutu 52.
Iha jogu seluk, Maudoko FC ne’ebé ambisaun hakarak hasa’e pozisaun iha tabela klasifikasaun tenke derrota ho S’amuser ne’ebé menus jogadora hafoin Olisia Fernandes hetan kartau mean iha minutu 78.
Ekipa S’amuser manán Maudoko ho skor mihis 1-0 iha-ne’ebé golu referidu prodús husi jogadora Natalia Lawa iha minutu 58.
Ho rezultadu jogu rua referida rezulta AD SLB mantein iha pozisaun dahuluk ho pontu 19, rezultadu manán 6 no impata ida (1), enkuantu Buibere obrigadu tun ba pozisaun datoluk (3) ho pontu 16.
Entretantu, S’amuser FC haka’as ba pozisaun daruak ho totál pontu 19, rezultadu manán neen (6) no impata ida (1), enkuantu Maudoko mantein iha pozisaun dahaat (4), rezultadu manán lima (5), impata ida (1) no derrota ida (1).
Jornalista: Natalino Belo
Editór: Xisto Freitas da Piedade
