DILI, 09 Dezembru 2025 (TATOLI) – Governu Austrália liuhusi Timor-Leste Police Development Programme (TLPDP) no Federal Police (AFP) ho komitmentu kooperasaun ne’ebé di’ak entrega mobile Closed Circuit Television (CCTV) ba Polísia Nasionál Timor-Leste (PNTL) atubele kontrola problema krime sira iha Dili laran.
Ministru Interiór, Francisco da Costa Guterres, informa, inisiativa Governu Austrália nian apoia ekipamentu teknolojia hirak-ne’e, hafoin nia hala’o enkontru ho TLPD no AFP ne’ebé mak iha kooperasaun metin tebes ho PNTL.
“Mobile CCTV ne’e sira apoiu ba iha Polísia Nasionál Timor-Leste ne’ebé mak bolu kamera kontrolu CCTV ne’ebé maka movel ne’ebé sira sei entrega CCTV sira iha Dili laran tomak, kuandu iha situasaun ruma akontese sira bele la’o daudaun, bele kontrola hela,” Ministru Interiór ne’e informa ba jornalista sira, hafoin simu mobile CCTV husi TLPD no AFP, iha MI, Vila-Verde, tersa ne’e.
Governante ne’e husu PNTL atu kuida didi’ak ekipamentu hirak-ne’ebe parseiru Austrália apoia, nune’e ba oin bele utiliza ba tempu naruk no bele monta iha fatin sira iha Dili laran.
Nia rekoñese, durante ne’e PNTL iha difikuldade bainhira mosu problema krime sira iha Dili laran susar atu deteta autór sira, nune’e ho apoiu mobile CCTV ne’e espera katak, deteta lalais bainhira mosu krime.
“Ho apoiu CCTV ne’e, ba oin PNTL mós sei halo ligasaun ho mobile telefone ne’ebé mak dezignadu ona, hodi sira liga ba depois kontrola hela, hodi hatene fatin ida-ne’e mosu problema,” nia afirma.
Ministru Interiór konsidera apoia CCTV ida-ne’e nu’udar pasu pozitivu, bainhira ema baku malu, polísia bele ba haree hodi halo atuasaun tanba ekipamentu elektrónika ne’e ho objetivu tulun polísia sira halo serbisu.
“Tanba ne’e, ministru ne’ebé toma responsável ba asuntu seguransa agradese tebes ba Austrália ne’ebe mak iha komitmentu entrega ekipamentu hirak-ne’e ba PNTL bele reforsa liután sira-nia serbisu ho di’ak,” nia kongratula.
Ministru Interiór esplika, mobile CCTV ne’e hamutuk rua, ida sei instala iha sentru operasaun komandu PNTL ka bele monta iha fatin ne’ebé determinadu no ida polísia sira sei lori tuituir sira-nia aan.
“Polísia sira bele halo patrullamentu lori tuir mákina CCTV ne’e atubele haree, fatin ida-ne’e iha problema, entaun sira bele ba halo atuasaun iha-ne’ebá,” nia fundamenta.
Nune’e mós, Komisáriu Adjuntu Krime Australian Federal Police (AFP) Ian McCartney, subliña, apoia referida nu’udar kooperasaun bilaterál entre Austrália ho Timor-Leste, nune’e bele reforsa serbisu autoridade seguransa nian.
“Ohin ita mai hodi hatudu katak, AFP fó ekipamentu ne’ebé ohin ita haree hodi ajuda PNTL, atubele hala’o servisu di’ak liután, tanba ho mobile CCTV ne’e bele deteta lalais problema sira,” nia katak.
Jornalista: Natalino Costa
Editór: Evaristo Soares Martins
