VIKEKE, 09 Dezembru 2025 (TATOLI)—Organizasaun Naun Govermentál Fundasaun Knua Haberan Komunidade (F-KHK) liuhusi apoiu CARE International iha Timor-Leste, hahú konstrui sentru evakuasaun ba komunidade Aldeia Uma-Boot, Suku Luka, Postu Vikeke Vila, Munisípiu Vikeke.
Diretór Ezekutivu F-KHK Munisípiu Vikeke, Augosto Pinto haktuir daudaun ne’e komunidade Aldeia Uma-Boot halo hela konstrusaun sentru evakuasaun ida iha Aldeia Uma-Boot ba komunidade atu uza bainhira akontese dezastre ruma.
“Ba estabelesimentu sentru evakuasun ne’e ita hetan apoia fundu husi CARE International hodi konstrui sentru evakuasaun kompleta ho armazein, hariis-fatin, sistema weather station,” Augosto Pinto ba TATOLI iha Postu Vikeke, Tersa ne’e.
Nia esplika estabelesimentu sentru evakuasaun ne’e bazeia ba ezijénsia komunidade Aldeia Uma-Boot, ne’ebé kada tinan sempre afetadu ba inundasaun.
Orsamentu ba estabelesimentu sentru evakuasaun ne’e hamutuk $5.800 hodi sosa materiál, maibé konstrusaun komunidade hala’o ho vuluntária.
Jornalista: Vitorino Lopes da Costa
Editór: Xisto Freistas da Piedade
