DILI, 09 Dezembru 2025 (TATOLI) – Portavós no reprezentante Família Ira Ara, Mehara, no Lorehe, Lautein, Luciano Romano Timor Maubere, no ekipa hasoru malu ho eis-Primeiru-Ministru atuál Seketáriu-Jerál partidu FRETILIN, Mari Alkatiri, hodi diskute kona-ba livru ne’ebé hakerek husi Sérgio Dias Quintas.
Portavós konsidera katak livru ho títulu “RAJA VERRÍSSIMO DIAS QUINTAS Saya Mati Untuk Kemerdekaan” nakonu ho “plajiarizmu ka falsifika informasaun”.
“Ami komunidade husi Munisípiu Lautém, família husi rezisténsia no família husi maun-alin sira-ne´ebé uluk iha masakre Muapitine, balun reprezenta husi suku Mehara, Lore, Soru no Fuiloro, mai hasoru malu ho eis-Primeru-Ministru, Mari Alkatiri, atu ko’alia kona-ba livru ne’ebé eskritór Sérgio Dias Quintas, hanesan lei na’in-ida iha konsiénsia falsifika no manipula até nega tán akontesimentu sira iha rai laran,” Luciano Romano Timor Maubere dehan ba jornalista sira iha Faról, Segunda ne’e.
Portavós no reprezentante Família Ira Ara hasoru malu Eis Xefe Governu, tanba hanesan mós fundadór ba rai ida-ne’e no dirijente ba partidu FRETILIN, hodi husu nia hanoin kona-ba kazu referida.
“Ami mai hodi husu fundadór ne’e nia hanoin ba prosesu ne’ebé ami liu, hanesan kazu nasionál ida, ema halo manipulasaun ba istória, tanba istória ne’e labele manipula,” nia akresenta.
Nia konta katak istória ne’ebé hakerek iha “RAJA VERRÍSSIMO DIAS QUINTAS Saya Mati Untuk Kemerdekaan”ne’e tuir istória loloos husi komandante Kuba liurai Mehara ninian, maibé nia muda fali ba nia-aman Verríssimo Dias Quintas. Husi parte seluk halo mós “flasifikasaun dokumentu FALINTIL no gerilleiru sira.”
“Livru ne’e la’ós nia hanoin no halo peskiza mak hakerek, maibé kontestu iha livru ne’e tanba plajiarismu ka na’ok dokumentu husi funu na’in seluk no troka de’it ba nia-aman nia naran Verríssimo Dias Quintas,” nia akresenta.
Portavós defende katak sira sei la hakerek fali livru seluk atu counter fali nia livru, maibé nia falsifika entaun ida-ne’e lei la permite.
Jornalista: Ivonia da Silva
Editór: Evaristo Soares Martins
