JICA-MNEK realiza semináriu kona-ba konvensaun ASEAN kombate terrorizmu
DILI, 09 dezembru 2025 (TATOLI)—Governu Japaun liuhusi Ajénsia Kooperasaun Internasionál Japaun (JICA-sigla inglés) servisu hamtuk ho Ministériu Negósiu Estranjeiru no Kooperasaun (MNEK), hala’o semináriu loron ida kona-ba Konvensaun ASEAN (Asosiasaun Nasaun Sudeste Aziátiku) Kombate Terrorizmu.
Semináriu ne’e aprezenta oradór prinsipál sira inklui Ajénsia Nasionál Kontra Terrorizmu (BNPT) Indonézia nian, ne’ebé fahe sira-nia esperiénsia kona-ba kontra terorizmu.
“Ita agora halo parte iha ASEAN, no tanba ne’e, ida-ne’e halo parte iha ami nia polítika seguransa, Konvensaun ASEAN kona-ba Kombate Terrorizmu. Hafoin halo parte iha ASEAN, tanba ami asina hotu ona akordu sira-ne’e, ami agora hahú implementa ona,” Vise-Ministra ba Asuntu ASEAN, Milena Rangel, hateten ba jornalista sira iha salaun City 8 Comoro, Dili, tersa ne’e.
Milena esplika, atu implementa ho efetivu tanba ne’e Timor-Leste tenke aprende husi nasaun membru sira inklui BNPT husi Indonézia, nune’e sira bele fahe nia esperiénsia ba partisipante sira iha Institutu ne’e.
“Ita tenke buka esperiénsia barak husi nasaun membru sira, ita hanesan ona membru ASEAN kontinua aprende nafatin liuliu kona-ba oinsá atu kombate terorizmu,” Governante ne’e dehan.
Iha fatin hanesan, Adjuntu Xefe Misaun Embaixada Japaun nian iha Timor-Leste, Yuki Sakai, hateten ida-ne’e hanesan semináriu ba da-hitu (VII) ne’ebé organiza husi JICA no MNEK nu’udar parte ida husi Projetu hasa’e Koordenasaun no Monitorizasaun Adezaun ba ASEAN.
“Ha’u haksolok tebes haree kolaborasaun entre JICA ho MNEK, ho apoiu folin-boot husi Ministériu Negósiu Estranjeiru Repúblika Indonézia nian no hosi Ajénsia Nasionál Kontra Terrorizmu Indonézia nian, hodi organiza eventu ne’e,” nia hateten.
Nia esplika, Japaun apoia Timor-Leste nia esforsu atu sai membru plenu ba ASEAN inklui liuhusi diálogu, fortalesimentu institusionál no programa kapasitasaun durante tinan barak, no Japaun sei akompaña nafatin Timor-Leste hodi avansa nia integrasaun iha ASEAN.
“Terorizmu hanesan dezafiu ida-ne’ebé ultrapasa fronteira sira. Laiha nasaun ida maka bele rezolve mesak. Tanba ne’e maka koperasaun rejional, konfiansa mútua no diálogu regulár hanesan krusiál,” nia dehan.
Nia hatutan, Japaun sei kontinua servisu hamutuk ho Estadu membru ASEAN sira inklui Timor-Leste hodi hadi’a jestaun fronteira, hasa’e troka informasaun no dezenvolve prosedimentu operasionál prátiku sira.
“Indonézia iha esperiénsia prátika tinan barak hodi implementa lei sira antiterorizmu nian, koordena instituisaun oioin no atua tuir mekanizmu sira ASEAN nian. Progresu Indonézia nian hatudu oinsá maka esforsu sira-ne’ebé sustentadu no koperasaun rejionál bele hametin seguransa nasional. Partisipante sira iha ne’e bele hetan benefísiu maka’as husi aprendizajen ne’e,” nia hateten.
Enkarregadu Asuntu Embaixada Indonézia nian iha Timor-Leste, Nugroho Aribhimo, hateten hodi Embaixada Indonézia nia naran hato’o apresiasaun ba MNEK no JICA tanba halibur parte rua ne’e hamutuk ba semináriu ne’ebé importante tebes.
“Prezensa husi oradór sira husi Ajénsia Nasionál Kontra Terrorizmu Indonézia nian (BNPT) iha semináriu ne’e hatudu apoiu husi Indonézia ba Timor-Leste iha ámbitu ASEAN nian,” nia dehan.
Nia esplika, Akordu kona-ba Entendimentu Konvensaun ASEAN nian kona-ba Kontra Terrorizmu (ACCT) hanesan foku xave ida.
“Konvensaun Anti-Terorizmu (ACCT) nian la’ós de’it atu kombate terorizmu diretamente, maibé mós serve objetivu sira-ne’ebé luan liu, inklui prevene radikalizasaun no estremizmu violentu, hametin kooperasaun legál no seguransa iha rejiaun, aborda rede finansiamentu no apoiu terorizmu nian, proteje sidadaun sira no direitu umanu, mantein estabilidade no preparasaun rejionál no preparasaun rejionál no rejionál,” nia hateten.
Nia subliña, Indonézia sempre sai apoiante firme no vokál ba adezaun Timor-Leste iha ASEAN. Ba Indonézia, krusiál atu halo Timor-Leste sai parseiru ida hodi harii Sudeste Aziátiku ida-ne’ebé reziliente no prósperu liu.
“Apoiu ba Timor-Leste iha ASEAN hanesan esforsu koletivu ida. Ami apresia tebes Governu Japaun liuhosi JICA no Embaixada Japaun nian iha Díli tanba fasilita ona workshop importante ida-ne’e, ne’ebé hakarak sai hanesan plataforma importante ida ba Timor-Leste,” nia dehan.
Jornalista : Hortencio Sanchez
Editór : Cancio Ximenes
