VIKEKE, 09 Dezembru 2025 (TATOLI)—Xefe Suku Uma-Tolu, Postu Administrativu Lakluta, Munisípiu Vikeke, Eduardo Soares informa progresu projetu melloramentu bee-moos husi Programa Nasionál ba Dezenvolvimentu Suku (PNDS) ba komunidade iha Aldeia Aisuco Nuc, daudaun ne’e iha progresu.
“Kona-ba progresu obra PNDS ba ami-nia suku ne’ebé halo melloramentu bee-moos, agora iha progresu. Konklui ona tanke rezervatóriu bee-moos iha semana kotuk no agora daudaun kontinua halo instalasaun kanu distribuisaun bee-moos ba komunidade,” Eduardo Soares ba TATOLI iha Postu Lakluta, Tersa ne’e.
Autoridade Suku Uma-Tolu ne’e rekoñese katak obra melloramentu ne’e seidauk konkluidu 100% tanba servisu implementasaun mak tarde.
“Maibé, ami sei esforsu hodi finaliza obra ne’e iha Dezembru tinan ne’e. Durante ne’e ami hasoru dezafiu ba fornesimentu materiál fabrikadu, liuliu paralon ninia junta dalaruma lori mai boot liu no balun ki’ik liu, entaun ita tenke gasta orsamentu hodi sosa fali. Ho kestaun sira-ne’e mak ami-nia obra seidauk konkluidu ne’e,” Eduardo haktuir.
Nia relata, durante ne’e komunidade hamutuk uma-kain 123 iha Aldeia Aisuco Nuc enfrenta liu ba bee-moos, maibé obra PNDS ba melloramentu bee-moos kuandu ramata, komunidade la hasoru ona difikuldade ba bee-moos.
“Melloramentu sistema bee-moos ne’e kada uma-kain lima sei asesu hamutuk nune’e ita-nia komunidade bele asesu hotu bee,” Eduardo hato’o.
Enkuantu, obra PNDS ba reabilitasuan sistema melloramentu bee-moos ne’ebé implementa iha Aldeia Aisuco-Nuc, Suku Uma-Tolu ho sistema bomba sei gasta orsamentu hamutuk $23.291,65, sei benefísia komunidade hamutuk 465 husi uma-kain 123, kompostu husi feto na‘in-222 no mane na’in-243.
Jornalista: Vitorino Lopes da Costa
Editór: Xisto Freistas da Piedade
