DILI, 09 Dezembru 2025 (TATOLI)—Sekretária Estadu Formasaun Profisionál no Empregu (SEFOPE), iha 08 Dezembru ne’e, asina akordu ho ajénsia supervizora foun Reimei Business Cooperative Kagoshima, Japaun, hodi formaliza no estabelese baze legál ba kooperasaun entre SEFOPE ho Reimei Business Cooperative Japan hodi implementa programa estajiáriu tékniku (TIT) ba joven Timoroan sira iha Japaun.
Sekretáriu Estadu Formasaun Profisionál no Empregu, Rogério Araújo Mendonça, hato’o sagradesimentu ba Reimei Business Cooperative, tanba sira prontu simu no aseita estabelese akordu kooperasaun ho SEFOPE, hodi implementa programa estájiu tékniku nian, ne’ebé fó oportunidade ba joven timoroan atu hetan formasaun no esperiénsia profesionál iha Japaun.
“Kooperasaun ne’e sei foku ba área prioritária sira hanesan, agrikultura, ospitalidade, kuidadu idozu, restaurante no konstrusaunm” Sekretáriu Estadu ne’e informa liuhui nota imprensa ne’ebé Agência TATOLI asesu, ohin.
Governante ne’e dehan, akordu ne’e fó oportunidade atu aumenta partisipasaun no empregabilidade ba joven timoroan sira liuhusi programa estájiu, atu sira bele hetan esperiénsia, koñesementu tékniku no formasaun profisionál iha ambiente internasionál.
Aliende ne’e, nia hateten, empregadór komprometidu atu iha Fevereiru 2026 sei ba Timor hodi hahú halo rekrutamentu ba kandidatu sira-ne’ebé sei mai hala’o servisu ka estájiu iha área konstrusaun liuliu hala’o servisu iha Portu nian.
Iha okazaun ida-ne’e, Diretór Reimei Business Cooperative, Fukusaki Yasushi, hato’o nia esperansa atu programa ida-ne’e la’ós de’it programa estájiu, maibé forma parte husi estratéjia dezenvolvimentu kapasidade no inkluzaun formasaun lian Japonés ba kandidatu sira.
Tamba ne’e, nia husu SEFOPE atu konsidera parte formasaun lian Japonés tanba ne’e sei fó preparasaun diak-liu ba estajiaru sira no aumenta kapasidade ba sira hodi adapta no konkorre iha merkadu traballu Japonés nian.
“Akordu ida-ne’e nia signifikadu boot iha sentidu dezenvolvimentu kapasidade, troka esperiénsia internasionál no kontribui ba dezenvolvimentu sosio-ekonómiku iha Timor-Leste, liuliu iha domíniu formasaun no empregu ba jerasaun foun,” nia hateten.
Enkuantu hafoin asina akordu kooperasaun ne’e, Sekretariu Estadu ho ekipa diretamente halo kedas site visit ba fatin ne’ebelé estajiáriu tekniku timor sira sei mai hala’o estájiu iha portu Ibusuki, Prefecture Kagoshima.
TATOLI
