DILI, 09 Dezembru 2025 (TATOLI)-Sekretaria Estadu Komunikasaun Sosiál (SEKOMS) lansa, ohin, Plataforma Suku Dijitál Sentru Informasaun Suku Kampung Alor.
Sekretáriu Estadu Komunikasaun Sosiál, Expedito Loro Dias Ximenes, hateten Plataforma Suku Dijitál importante tebes atu fasilita komunidade Kampung Alor hodi asesu informasaun sira kona-ba atividade suku nian, tanba ida-ne’e bele sosializa dezenvolvimentu dijitál ne’ebé la’o maka’as.
“Avansa teknolojia agora ne’e halo ita hotu tama iha laran. Programa ne’e uluk Naroman ba Suku, mai iha Governu ne’e, ami muda formatu, muda naran ba fali Sentru Informasaun Suku, oinsá suku sira sai sentru formasaun. Katak, suku ne’e tenke iha internét no iha plataforma komunidade bele asesu informasaun sira akontese iha suku laran”, Expedito Ximenes hateten iha Kampung Alor, ohin.
Governante ne’e dehan lansamentu ba Sentru Informasaun Suku ne’e hanesan pasu ida husi polítika Governu Dasiak nian. Aleinde progresu nasaun la’o iha setór hototu, maibé sei iha lakuna ka frakeza, nune’e ho lansamentu sentru informasaun atu responde lakuna ba iha área teknolojia informasaun no komunikasaun nian.
Tuir nia, programa Governu hakarak kria inisiativa Sentru Informasaun Suku atu lori serbisu informasaun ba povu no hamenus diferensa iha asesu informasaun entre sidade no suku.
Konseitu Suku Dijitál mak utilizasaun teknolojia internét (IT), iha servisu públiku, ekonomia, sosiál no kulturál.
Lakuna dezenvolvimentu ne’ebé eziste entre sidade no suku la’ós buat ki’ik. Diferensa iha populasaun, ekonomia no infraestrutura bele lori impaktu ba moris di’ak povu nian. Tanba ne’e, suku hotu tenke iha kapasidade atu akompaña mudansa teknolojia, liliu evolusaun dijitaál.
“Objetivu boot Suku Dijital mak kataliza serbisu públiku no mais ekonómiku, liuhusi serbisu online, website, rede sosiál, serbisu públiku sai transparente no responsavel. Komunidade sai krítiku no partisipativu, suku sai forte iha ekonómia, kultura no identidade rasik”, Expedito dehan.
Nia akresenta katak SEKOMS iha esperansa tolu ba iha Plataforma Informasaun Suku mak: Iha sinerjia di’ak entre Governu Sentrál, autoridade suku no komunidade, bele kria suku dijitál ida ne’ebé atuál, efisiente no empodera povu; Sentru informasaun mak fatin fíziku ka virtuál ne’ebé fornese dadus atuál no konfiavel, sentru informasaun importante tanba ajuda komunidade iha suku Kampung Alor asesu ba informasaun ne’ebé organizadu hodi evita dezinformasaun, lia falsu ka hoax no; Sentru ida ne’e funsiona tuir objetivu sira, ho apoiu husi SEKOMS no Ministériu Administrasaun Estatál atu hadi’a kapasidade pesoál suku, hodi garante sentru ne’e bele lao ho efikás no responde ba nesesidade suku nian.
Xefe Suku Kampung Alor, Estela Aleixo, agradese ba SEKOMS ne’ebé implementa Plataforma Informasaun Suku ne’ebé tama ona ba suku dijitál ne’e. “Ita hatene katak antes ne’e atividade laiha, maibé Governu ida-ne’e bele mai aplika suku dijitál. Ha’u fiar katak ita hamutuk lori dezenvolvimentu ba nasaun, liuliu ha’u-nia suku”, dehan.
Administradór Postu Administrativu Don Aleixo, José Soares, husu ba komunidade atu aproveita oportunidade sira ne’ ho di’ak tanba atu tama desentralizasaun tenke iha preparasaun.
Vise-Ministru Administrasaun Estatál, Jacinto Rigoberto, hateten lansamentu ne’e hanesan oportunidade di’ak ba jestaun administrasaun hahú husi suku to’o nasionál, tanba agora tama iha era dijitál. “Entaun, uza dijitalizasaun ne’e importante, tanba iha era dijitál ne’e tenke utiliza duni sistema dijitalizasaun ne’ebé iha, ida-ne’e rekizitu mínimu ida tama ba desentralizasaun no poder lokál”, dehan.
Jornalista: Arminda Fonseca
Editora: Maria Auxiliadora
