DILI, 09 Dezembru 2025 (TATOLI)—Ekipa futeból femininu rua hanesan UNITAL no Akadémika Football Club kontinua idak-idak rekolla pontu tolu hafoin manán iha jogu jornada dahitu primeira divizaun Liga Futeból Femininu Timor-Leste (LFFTL).
Rezultadu jogu iha jornada dahitu primeira divizaun LFFTL hatudu UNITAL FC rekolla pontu tolu hafoin manán Kulugisa FC ho skor 1-3 iha-ne’ebé golu tolu husi UNITAL prodús liuhusi jogadora Suzana Freitas iha minutu 34, 79 no Júlia Freitas iha minutu 82, enkuantu Kulugisa FC ne’ebé seidauk iha pontu prodús golu liuhusi jogadora Cláudia Sarmento iha minutu 7.
Aleinde ne’e, Akadémika FC rasik aumenta pontu tolu iha tabela klasifikasaun hafoin gaña vitória husi ekipa Na’in-Feto FC ho skor 6-0, iha-ne’ebé golu hirak-ne’e prodús liuhusi jogadora Juvência Soares iha minutu 10, Gradeana Avelina 27, Ingracia Almeida 46, 63 no golu rua seluk enxe husi jogadora Hermenia da Costa iha minutu 57 no 70.
Ho rezultadu vitória husi ekipa rua, rezulta UNITAL iha pozisaun daneen ho pontu sia (9) ho totál produtividade golu -7, enkuantu Akadémika iha pozisaun dahitu (7) pontu sia (9) maibé menus produtividade golu 12 (-12).
Entretantu, ekipa Na’in-Feto FC iha pozisaun dasiak ho pontu ida (1), rezultadu impata ida (1) no derrota neen (6), enkuantu Kulugisa kontinua iha pozisaun dasanuluk ne’ebé seidauk rekolla pontu (0) ho menus ona golu hamutuk 77 (-77).
Jornalista: Natalino Belo
Editór: Xisto Freitas da Piedade
