Xanana sei hasoru Sekretáriu Jerál ASEAN hametin kompromisu hodi promove pás

DILI, 09 Dezembru 2025 (TATOLI)–Primeiru-Ministru, Kay Rala Xanana Gusmão, sei hala’o vizita no hasoru malu ho Sekretáriu Jerál ASEAN, Kao Kim Hourn, iha Sekretariadu ASEAN nian iha Jakarta-Indonézia iha 11 Dezembru 2025, atu hametin kompromisiu kona-ba promove pás iha nasaun membru ASEAN nian.

Tuir nota ne’ebé TATOLI asesu husi pajina ofisiál ASEAN nian iha Jakarta hateten katak, vizita ne’e sei reflete kompromisu metin Timor-Leste nian ba ASEAN nia valór no aspirasaun sira ne’ebé fahe, bainhira ASEAN kontinua hametin ninia esforsu koletivu sira hodi promove pás, estabilidade, no prosperidade rejionál.

“Vizita ne’e sei reflete kompromisu metin Timor-Leste nian ba ASEAN nia valór no aspirasaun sira-ne’ebé fahe, bainhira ASEAN kontinua hametin ninia esforsu koletivu sira hodi promove pás, estabilidade, no prosperidade rejionál. Sei destaka mós Timor-Leste nia admisaun istóriku nu’udar Estadu-membru ASEAN ba da-11 no subliña ninia kompromisu atu kontribui ho signifikativu ba serbisu ASEAN nian, partikularmente hodi avansa ASEAN 2045, Ita-nia Futuru Kompartilladu,” nota ne’e haktuir.

Vizita ne’e sei inklui diskursu Polítika husi Kay Rala Xanana Gusmão, Interfase ida ho Sekretáriu Jerál ASEAN no Komité Reprezentante Permanente sira ba ASEAN (CPR), aprezentasaun Íkonu Timor-Leste nian ba ASEAN nomós serimónia kuda ai-oan no seluk tan.

Daudau ne’e, Primeiru-Ministru, Kay Rala Xanana Gusmão, iha hela Jogjakarta-Indonézia hodi halo negosiasaun fronteira terrestre no marítima ho Indonézia.

TATOLI