DILI, 10 Dezembru 2025 (TATOLI) – Austrália implementa proibisaun asesu rede sosiál nu’udar bandu dahuluk iha mundu ba labarik sira ho idade tinan 16 mai kraik tanba labarik sira sei iha infánsia.
Primeiru Ministru Austrália, Anthony Albanese hakerek ba líder sira Estadu no territóriu australianu nian iha loron-tersa (09 Dezembru) hodi agradese ba sira-nia apoiu ba bandu hosi mídia sosial sira, ne’ebé tama iha vigór iha loron-kuarta (10 Dezembru).
Nia mós rekoñese katak reforma ne’e sei presiza halo ajustamentu balun iha tempu badak.
“Ida-ne’e maka mudansa kulturál ne’ebé maka Austrália presiza hodi fó ba inan-aman sira dame boot liu no garante katak labarik australianu sira bele iha infánsia ida,” hakerek husi primeiru-ministru australianu, Anthony Albanese.
Tuir lei, ne’ebé aprova hosi parlamentu federál iha fulan-Novembru 2024, plataforma balun hosi mídia sosiál sira presiza foti “pasu razoavel sira” hodi prevene labarik sira ho tinan menus hosi 16 atu iha konta sira.
To’o agora, plataforma mídia sosiál 10 hetan ona instrusaun atu implementa bandu: Facebook, Instagram, Snapchat, Threads, TikTok, Twitch, X, YouTube, Kick, no Reddit. Autoridade sira bele atualiza lista ne’e bainhira presiza.
Iha mensajen vídeu ida ne’ebé sei hatudu ba estudante sira iha eskola sira iha Austrália tomak, Albanese hatete katak governu halo hela mudansa sira hodi apoia labarik sira ne’ebé sai boot ho algoritmu sira, feed sira hosi mídia sosiál ne’ebé laiha rohan, no presaun sira ne’ebé sira kria.
Tuir lei, labarik sira ka sira-nia inan-aman sei la hetan penalizasaun tanba viola bandu, ho responsabilidade ba aplikasaun ne’ebé monu de’it ba plataforma sira mídia sosiál nian.
Plataforma sira ne’ebé komete violasaun grave ka repete sei hasoru multa to’o dolar australianu millaun 49,5 (maizumenus dolar amerikanu millaun $32,8), maske governu rekoñese katak teknolojia verifikasaun idade nian sei lori tempu hodi identifika konta sira hotu ne’ebé pertense ba menór sira.
Fonte: Reuters/Xinhua/Antaranews
