KOVALIMA, 10 Dezembru 2025 (TATOLI)–Administradór Postu Administrativu Tilomar, Munisípiu Kovalima, Venancio Sarmento, alerta ba komunidade no ba joven-sira uza mídia dijitál tenke ho konsiénsia no disiplina, nune’e labele fo impaktu negativu.
“Ha’u hakarak fó hanoin ba ita hotu espesial ba joven-sira uza mídia tenke ho di’ak labele uza mídia hodi fó impaktu negativu ba ita.tanba realidade hatudu akontese ona buat barak bainhira uza mídia dijitál”, Administradór postu Tilomar, Venancio Sarmento hato’o bainhira hato’o mesanjen iha salaun sede Suku Maudemo,Tilomar ohin.
Autoridade postu fó sai alerta ne’e , tanba durante nia rasik observa katak komunidade ho idade ne’ebé maka adultu no alunu sira mós okupadu maka halo tiktok ,tanba ne’e uza mídia dijitál tenke ho disiplina atu labele fó impaktu.
Nia dehan, uza mídia dijitál iha-nia vantajen maka bele hasa’e dignidade no desbantazen maka bainhira uza sala mídia bele hatun dignidade hanesan mós asume kargu importante sira nu’udar dirijente no Autoridade.
Iha sorin seluk, Diretora Servisu Munisipál Apoiu Organizasaun Noun Governamentál no Organizasaun Komunitária, Maria de Jesus, husu ba joven no alunu sira atu labele uza sala dijitál hodi fó impaktu negativu.
“Ita labele uza sala dijitál iha ami nia tempu karta ruma ami hakerek de’it ho liman, maibé daudaun ne’e uza de’it ona dijitál. Ami inan-aman sosa telefone atu fasilita ita-boot sira atu estuda”, nia afirma.
Dirijente ne’e esplika katak inan-aman sosa telefone, oinsá fasilita alunu sira atu estuda disiplina ne’ebé maka profesór sira hanorin iha eskola bainhira la komprende bele buka referénsia.
Jornalista:Celestina Teles
Editór: Florencio Miranda Ximenes
