VIKEKE, 10 Dezembru 2025 (TATOLI)—Organizasaun Naun Governamentál Fundasaun Knua Haberan Komunidade (F-KHK) iha inisiativa kria kompetisaun kulinária ba grupu sira hodi te’in ai-han lokál.
Objetivu husi kompetisaun kulinária ne’e atu promove produtu lokál sira-ne’ebé grupu sira prodús.
“Ami realiza kompetisaun ne’e hodi promove ita-nia produtu lokál atu kompete iha merkadu. Nune’e, iha kompetisaun ne’e grupu sira lori produtu sira hanesan ai-farina, talas, foos-rai, manu lokál no ikan haki’ak. Produtu hirak-ne’e ita-nia grupu prodús rasik mak lori mi partisipa iha kompetisaun,” Diretór Ezekutivu F-KHK, Augusto Pinto ba TATOLI iha Suku Uma-Ki’ik, Postu Vikeke Vila, Kuarta ne’e.
Nia esplika grupu sira prepara hotu ai-han lokál sira-ne’e mak ekipa juri kompostu husi saúde no F-KHK fó valór.
Kompetisaun te’in produtu lokál ne’e maihusi grupu haat mak hanesan grupu Luruboru, Grupu Haforsa Ekonomia Komunidade, Grupu We Au no Grupu Maltut. Iha kompetsaun ne’e, vensedór dahuluk sei hetan osan $150.00, daruak $100.00 no datoluk $75.00.
Iha fatn hanesan, reprezentante Grupu Haforsa Ekonomia Komunidade, Anabela Soares Freitas, sente kontente bainhira partisipa kompetisaun ne’e tanba bele motiva grupu sira hasa’e valór ekonomia husi produtu lokál sira-ne’ebé grupu sira kuda.
“Atu manán ka lakon la’ós sai problema, maibé bele aprende buat di’ak iha kompetisaun referida. Nune’e, ami sujere bá-oin nafatin realiza kompetisaun sira-ne’e atu grupu sira bele partitisapa,” nia hato’o.
Aleinde ne’e, Grupu We Au, Rodolfo da Silva Pinto, haktuir kompetisaun ne’e Grupu We Au promove produtu lokál sira hanesan ai-farina, fehuk-midar, modo no manu lokál.
“Ha’u sente kompetisaun ne’e motiva tebes ami, atu bá-oin ami bele prepara produtu lokál barak liután. Tanba ita haree produtu lokál sira-ne’e iha valór ekonomia no bele ajuda grupu sira bainhira prodús barak,” nia subliña.
Entretantu, partisipa iha kompetisaun ne’e autoridade lokál, funsionáriu F-KHK no komunidade Suku Uma-Ki’ik.
Selebra Loron Mundiál Direitu Umanu
Iha parte seluk, F-KHK hamutuk ho Autoridade Munisípiu Vikeke selebra Loron Mundiál Direitu Umanu ba dala-77 liuhusi realiza semináriu ba komunidade atu prevene violénsia bazeia ba jéneru.
“Ohin ita selebra Loron Direitu Umanu ba dala-77 hodi realiza semináriu ba komunidade iha Suku Uma-Ki’ik hodi prevene violénsia doméstika sira. Alende ne’e, ami mós selebra loron F-KHK ninia ezisténsia tinan 15 iha Munisípiu Vikeke,” Diretór F-KHK, Augosto Pinto hateten iha abertura semináriu ba selebrasaun Loron Direitu Umanu, iha sede Suku Uma-Ki’ik, Vikeke Vila.
Iha fatin hanesan, Reprezentante Komandante Polísia Nasionál Timor-Leste (PNTL) Munisípiu Vikeke, atuál Segundu Komandante Munisípiu Vikeke, Belarmino da Rosa, hato’o agradesimentu ba F-KHK ne’ebé organiza semináriu ho tema ‘Kombate violénsia hasoru feto no labarik sira’ ne’e.
“Liuhusi selebrasaun ida-ne’e ita hamutuk hodi kombate violénsia sira. Ha’u hanoin ita tenke hakribi violénsia, maibé hamosu mak domin atu ita-nia Munisípiu Vikeke no nasaun nakonu ho estabilidade no pás hodi kontribui ba dezenvolvimentu,” nia subliña.
Iha biban hanesan, Xefe Suku Uma-Ki’ik, Claudino Amaral hato’o agradesimentu ba KHK ne’ebé hili Suku Uma-Ki’ik hodi selebra Loron Direitu Umanu no Suku Uma-Ki’ik sempre koopera ho entidade sira hotu tantu Governu no sosiadade sivíl sira.
“Selebrasaun Loron Mundiál Direitu Umanu ne’e atu ita bele kombate no redús violénsia sira. Ne’e ita hotu nia responsablidade. Nune’e, liuhusi semináriu sira-ne’e hodi advokasia ba komunidade liuliu ba problema violénsia hasoru feto no labarik sira,” nia dehan.
Partisipa iha selebrasaun ne’e kompostu hiusi autoridade lokál, diretór servisu munisipál, veteranu, membru PNTL, funsionáriu, grupu no komunidade Uma-Ki’ik.
Jornalista: Vitorino Lopes da Costa
Editór: Xisto Freitas da Piedade
