DILI, 10 Dezembru 2025 (TATOLI)—Governu liuhusi reuniaun Konsellu Ministru delibera hodi autoriza Ministra Finansa, Santina Cardoso, asina akordu empréstimu ho Banku Aziátiku Dezenvolvimentu (ADB), ho objetivu atu finansia ba projetu hadi’a estrada nasionál Faze I.
Tuir informasaun ne’ebé Agência tatoli asesu iha portál Governu haktuir, projetu ida-ne’e ho objetivu atu moderniza maizumenus kilómetru 42 husi estrada importante sira iha rede rodoviária nasionál, hodi introdús infraestrutura adaptasaun klimátika ho eskala ki’ik iha suku neen (6) ne’ebé baibain sofre ba inundasaun no rai-maran, atu nune’e bele hadi’a konektividade ho munisípiu sira iha parte súl no leste.
Projetu ne’e inklui mós reabilitasaun ba ponte tolu hanesan iha Seicál, Borouai no Malailada, ne’ebé lokaliza entre Baukau no Lautein, aleinde ne’e sei rezolve mós vulnerabilidade prinsipál sira husi komunidade iha korridór rodoviáriu, liuhusi implementasaun medida reziliénsia klimátika nian ne’ebé lidera husi komunidade hodi hamenus risku husi impaktu mudansa klimátika ba suku sira-ne’ebé vulnerável.
Empréstimu ne’e oferese kondisaun neʼebé favorável tebes ba Governu Timor-Leste ho taxa juru 1% kada tinan, ho prazu tinan 40, períodu karénsia tinan 10 no amortizasaun prinsipál 2% kada tinan iha dékada dahuluk hafoin períodu karénsia no ho 4% iha tinan sira tuir mai, hodi garante enkargu finanseiru ida-ne’ebé sustentável ba Estadu.
Tuir análize kle’an ida kona-ba projetu oioin ne’ebé finansia ho empréstimu, ne’ebé destaka dala ida tan ezisténsia inisiativa ne’ebé seidauk hahú ka ho nivel ezekusaun neʼebé ki’ik tebes, nune’e Governu deside atu kansela projetu sira-ne’e balun no avalia fila-fali sira ida-idak nia fonte finansiamentu.
Iha kontestu ida-ne’e, Akordu Finansiamentu balun ne’ebé mak vigora daudaun la nesesáriu ona, nune’e Konsellu Ministru autoriza halo kanselamentu ba projetu “Power Distribution Modernization” ne’ebé iha loron 20 Dezembru 2021, halo akordu finansiamentu ne’ebé halo ona ho ADB ho montante millaun $35.
Aleinde ne’e, halo kanselamentu integrál ba akordu finansiamentu ne’ebé halo ona ho ADB relasiona ho Projetu “Dili West Water Supply”, 25 Outubru 2022, ho montante millaun $50 no ikus liu deside kanselamentu totál ba akordu finansiamentu ne’ebé halo ho ADB kona-ba projetu “Prezidente Nicolau Lobato International Airport Expansion”, loron 01 Janeiru 2021, ho montante millaun $85.
Jornalista : Alexandra da Costa
Editór : Cancio Ximenes
