DILI, 10 Dezembru 2025 (TATOLI)—Governu liuhusi reuniaun Konsellu Ministru, kuarta ne’e, delibera hodi nomeia Ministru Administrasaun Estatál, Tomás do Rosário Cabral, no Ministru Defeza, Donaciano do Rosário Gomes, hodi integra misaun mediasaun Komunidade País Lian Portugés (CPLP), ho intensaun atu akompaña situasaun neʼebé mosu tanba golpe Estadu no prosesu interrupsaun eleitorál iha Giné-Bissau.
Nune’e, konsidera rekomendasaun ba suspensaun temporáriu Giné-Bissau nian no proposta atu transfere prezidénsia organizasaun nian ba Estadu-Membru seluk ne’ebé deside husi Konsellu Ministru Negósiu Estranjeiru CPLP nian.
Konsellu Ministru mós delibera hodi espresa disponibilidade husi Timor-Leste atu asume prezidénsia rotativa CPLP nian ba períodu 2026-2027.
Aleinde ne’e, iha reuniaun Konsellu Ministru ne’e, aprova projetu rezolusaun Governu nomeia Névio Sarmento asume kargu nu’udar Prezidente Konsellu Diretivu Institutu Nasionál Saúde Públika, Timor-Leste (INSP-TL).
Rezolusaun Governu ne’e aprezenta husi Vise-Ministru ba Fortalesimentu Institusionál Saúde, José dos Reis Magno, ne’ebé halo ezonerasaun ba membru atuál sira Konsellu Diretivu Institutu Nasionál Saúde Públika Timor-Leste (INSP-TL) nian no nomeasaun ba titulár foun sira ba órgaun ida-ne’e ba períodu tinan haat, iha rejime komisaun servisu, hahú iha loron 01 fulan-Janeiru tinan 2026.
Nune’e liuhusi Rezolusaun Governu ida-ne’e, Névio Sarmento hetan nomeasaun ba kargu prezidente Konsellu Diretivu INSP-TL nian no Gustodio Alves de Jesus no Endang Soares da Silva ba kargu vogál husi Konsellu Diretivu institutu públiku ida-ne’e nian.
Renovasaun ekipa dirijente INSP-TL nian ne’e ho objetivu atu hametin kapasidade jestaun ba instituisaun ne’e, tuir orientasaun Programa Governu Konstitusionál da-sia (IX) nian.
Jornalista : Alexandra da Costa
Editór : Cancio Ximenes
