DILI, 10 Dezembru 2025 (TATOLI)–Jogu entre ekipa Vietname no Malázia sei determina destinu ekipa Timor-Leste atu hakat bá faze meiu finál kompetisaun jogu modalidade futeból SEA Games.
Jogu entre nasaun rua referida tuir oráriu sei realiza iha Estádiu Rajamangala, Kinta (11/12/2025), iha-ne’ebé sei rezulta ekipa best runner up hodi reprezenta grupu ba faze meiu finál.
Bazeia ba sistema, kompetisaun modalide futeból SEA Games fahe ba Grupu A, B no C iha-ne’ebé winner group automátika bá meiu finál. Enkuntu, best runner up entre A, B no C sei hadau tikete ida hodi kompleta ekipa haat iha meiu finál.
Haree ba tabela klasifikasaun grupu, ekipa tolu hanesan Grupu A Thailándia, Malázia Grupu B no Grupu C husi Filipina, posibilidade hakat uluk ona bá meiu finál, enkuantu ekipa tolu hanesan Vietname, Timor-Leste no Indonézia sei hadau tikete ida hodi hakat bá faze meiu finál.
Nune’e, rezultadu jogu entre Vietname no Malázia no Indonézia no Myanmar sei determina destinu Timor-Leste atu hakat bá faze meiu finál bazeia ba kontajen pontu iha tabela klasifikasaun best runner up nian.
Tuir tabela klasifikasaun, best runner up lidera husi Vietname ho pontu tolu (3), rezultadu manán ida (1) ho produtividade golu ida (1), Timor-Leste iha pozisaun daruak ho pontu tolu (3), rezultadu manán ida (1) no lakon ida (1) iha produtividade menus golu tolu (3). Enkuantu, Indonézia pontu 0, rezultadu derrota ida (1), menus golu ida (1) hafoin derrota ho Filipina ho skor 1-0.
Jornalista: Natalino Belo
Editór: Xisto Freitas da Piedade
