VIKEKE, 10 Dezembru 2025 (TATOLI)—Konsellu Koordenasaun Munisipál (KKM) Vikeke, Kuarta ne’e, halo ona aprovasaun ba Planu Dezenvolvimentu Munisipál (PDM ba tinan 2026-2030.
Aprovasaun planu PDM ne’e liuhusi votasaun ne’ebé lidera husi Prezidente Autoridade Munisípiu (PAM) Vikeke, Francisco C. S. de Gonzaga Soares no membru KKM na’in-36, iha-ne’ebé aprovasaun ba kapa, vizaun, misaun lima (5), pilár dezenvolvimentu 4 ho sub pilár hamutuk 27, objetivu estratéjiku 32, estratejia 238, inklui programa asaun 250 ba Planu Dezenvolvimentu Munisipál tinan lima (5), ne’ebé pasa ho votu unanimidade.
“Planu dezenvolvimentu munisipál ne’ebé aprova husi KKM ne’e sei kontinu lori bá nasionál. Ha’u hato’o agradesimentu ba ekipa elaborasaun PDM ne’ebé konsege elabora planu munisípiu Vikeke nian hodi aprezenta iha KKM,” Prezidente Autoridade Munisípiu (PAM) Vikeke, Francisco C. S. de Gonzaga Soares hateten iha Salaun Munisípiu Vikeke, Kuarta ne’e.
Iha sorumutu KKM ne’e, Administradór Postu Vikeke, Leopoldo da Costa Alves, haktuir liuhusi PDM ne’e atu lori Munisípiu Vikeke ba moris prósperu no fó-atensaun ba ekonomia munisípiu.
“Ha’u hanoin planu dezenvolvimentu ne’e sei fó-atensaun ba ekonomia azúl ruma, atu hasa’e ekonomia povu iha Munisípiu Vikeke,” nia tenik.
Estrutura KKM ne’e kompostu husi PAM, Sekretáriu Munisipál na’in-tolu (3), Diretór Servisu Munisipál no Delegasaun Territoriál, Administradór Postu Administrativu, Xefe Suku Eleitu husi Asembleia Postu Administrativu lima (5).
Partisipa iha sorumutu aprovasaun ba PDM ne’e husi ekipa téknika Ministériu Administrasaun Estatál (MAE) ba elaborasaun PDM, Xefe Gabinete PAM, Asesór PAM, Xefe Departamentu no funsionáriu sira.
Jornalista: Vitorino Lopes da Costa
Editór: Xisto Freitas da Piedade
