DILI, 10 Dezembru 2025 (TATOLI)–Atleta Boxe Timor-Leste na’in-tolu hanesan Domingas de Araújo, Grigório de Jesus no Alexandro Meliano, Kuarta ne’e, sei kompete jogu dahuluk modalidade boxe iha kompetisaun SEA Games 2025 iha Thailándia.
Tuir oráriu ne’ebé fó-sai, ba klase feto, atleta Domingas de Araújo Barros sei kontra Boxista husi Thailándia ho naran Thipsatcha Todwaree ne’ebé sei kompete iha kategoria kilógrama 49 ne’ebé realiza iha Chulalongkorn University Sports Center, Bangkok.
Ba klase mane, atleta Grigório de Jesus sei kontra boxista husi Vietname, Duong Nguyen Van ho kategoria kilógrama 57 ne’ebé hala’o iha Chulalongkorn University Sports Center, Bangkok.
Boxista Domingas Araújo no Grigório de Jesus rasik kompete iha faze oitavu finál nune’e bainhira manán sei hakat bá meiu finál ne’ebé tuir órariu sei realiza iha loron-Sesta (19/12/2025).
Enkuantu, Alexandre Meliano da Costa Freitas ne’ebé kategoria kilógrama 69 automatikamente hakat bá oitavu finál tanba bazeia ba rezultadu sorteiu, atleta referidu kolokadu iha pot bye.
Entretantu, atleta Timor-Leste modalidade boxe ne’ebé kompete iha SEA Game’s 2025 hamutuk na’in-sia hanesan Jeremias Mendonça Amaral, Alexandro Meliano da Costa Freitas, Alexandro Jacob, António da Silva, Elísio Gaio, Grigório de Jesus, Domingos Barros, Titánia Quintas no Francisco Lobo.
Jornalista: Natalino Belo
Editór: Xisto Freitas da Piedade
