DILI, 10 Dezembru 2025 (TATOLI)-Sekretaria Estadu Kooperativa (SEKoop) asina akordu kontratuál ho CV Osfor Damai Sejahtera Indonesia atu disponibiliza formasaun ba funsionáriu na’in-25 husi instituisaun ne’e.
Sekretáriu Estadu Kooperativa, Arsénio Pereira, hateten formasaun ne’e realiza tanba kontinuasaun husi nota entendimentu ne’ebé SEKoop halo ona ho Ministériu Kooperativa Indonézia nian iha 2024.
“Ami agradese tebes ba ita-boot sira-nia apoiu iha formasaun no kapasitasaun ba ami-nia membru no funsionáriu sira, tanba ita hatene kooperativa nu’udar pilár importante ba ekonomia nasaun nian, nune’e kooperasaun ne’e nu’udar dalan ba susesu nian”, Arsénio Pereira hateten iha Akait, ohin.
Nia subliña katak formasaun husi Osfor Damai Sejahtera ne’e importante tanba daudaun Timor-Leste mós sai ona ba membru ASEAN no ida-ne’e atu Timor-Leste liuhusi kooperativa bele kontribui ba iha ekonomia nasaun nian.
Iha fatin hanesan, Diretór-Jerál Sekretaria Estadu Kooperativa, Olderico Lopes, hateten formasaun ne’e sei foka kona-ba jestaun finanseira ka kontabilidade kooperativa nian atu membru sira hatene jere osan.
Formasaun ne’e rasik durante loron haat, hahú iha loron 11 to’o 14 Dezembru 2025. Orsamentu ne’ebé prevee ba formasaun ne’e mai husi verba bens no serbisu nian hamutuk rihun $6 hodi apoia atividade ne’e, inklui akomodasaun nian.
Xefe Delegasaun CV Osfor Damai Sejahtera Indonesia, Ayu Sita, hateten sira-nia parte kontente tebes tanba SEKoop bele konvida sira hodi kapasita membru no funsionáriu SEKoop nian.
“Ami agradese tebes ba oportunidade ida-ne’e, ami prepara ona matéria ba formasaun nian ne’ebé sei fó durante loron haat. Espera husi formasaun ne’e ita bele kompleta malu iha prosesu dezenvolvimentu ekonomia Timor-Leste nian”, dehan.
Jornalista : Arminda Fonseca
Editora : Maria Auxiliadora
