DILI, 10 Dezembru 2025 (TATOLI)–Prezidente Repúblika, José Ramos-Horta, kuarta ne’e, entrega prémiu Direitu Umanu Sérgio Vieira de Mello da-18 ba vensedór na’in-neen (6) iha Palásiu Prezidensiál Nicolau Lobato, Bairru Pite, Dili.
Notísia Relevante: Manán-na’in prémiu “Sérgio Vieira de Mello” sai éroi ba dezenvolvimentu nasionál
Xefe Estadu ne’e hateten, prémiu Direitu Umanu Sérgio Vieira de Mello ba da-18 ne’e atu valoriza nafatin kontribuisaun Sérgio Vieira de Mello ninia legadu kontinua inspira esforsu koletiva ba Timor-Leste ida-ne’ebé justu liu.
“Premiu ne’e atu valoriza no rekoñese nafatin Sérgio Vieira de Mello nia kontribuisaun ba Timor-Leste. Nia kompromisu metin ba justisa, dignidade no igualdade mak fundamentu ba demokrasia nasaun nian no esperansa ba ita-nia futuru. Sira reprezenta duni espíritu Sérgio Vieira de Mello, ne’ebé ninia legadu kontinua inspira ita-nia esforsu koletivu ba Timor-Leste ida ne’ebé justu liu,” Xefe Estadu ne’e hateten iha ninia diskursu.
Tuir nia, iha aniversáriu Deklarasaun Universál Direitu Uamnu ne’e selebra kada 10 Dezembru ne’e, hanesan onra ba manán-na’in sira.
“Iha aniversáriu Deklarasaun Universál Direitu Umanu, hanesan onra ba ita atu rekoñese pessoal sira ne’ebé aten-barani no organizasaun sira ne’ebé dedikadu,” Prezidente Ramos-Horta hateten.
Vensedor sira-ne’e hili tuir prosesu avaliasaun ida-ne’ebé rigorozu husi Konsellu Onra, ne’ebé halo analiza ba aplikasaun sira no hala’o vizita verifikasaun iha fatin ba kandidatura sira-ne’ebé tama ona iha lista badak.
Prémiu ne’e fó tuir Dekretu Prezidente Republika Númeru. 129/2025, pesoál no organizasaun tuir mai ne’e mak simu Prémiu Direitu Umanu Sérgio Vieira de Mello ba Edisaun da-18 tuir kategoria sira mak hanesan:
Kategoria I: Direitu Sivíl no Polítiku
- Isabel Antónia da Costa Galhos
- Me. Leonie Manalu, FCJM
- Julião Cardoso
Kategoria II: Direitu Ekonómiku, Sosiál no Kulturál
- Kooperativa Comsoi
- Grupo Monocura
- Assosiasaun Esperansa Feto Difisiénsia
Antes ne’e, Prémiu Direitus Umanu Sérgio Vieira de Mello nu’udar inisiativa ne’ebé lansa iha tinan 2008 husi Prezidente Repúblika, José Ramos-Horta, ho objetivu atu rekoñese kontribuisaun husi sidadaun timoroan, sidadaun estranjeiru, organizasaun governamentál ka naun-governamentál sira, ba prosesu promosaun, protesaun no defeza direitu umanu iha Timor-Leste.
Prémiu ida-ne’e fó tinan-tinan husi Prezidente Repúblika iha loron 10 fulan-Dezembru, data adosaun Deklarasaun Universál Direitu Umanu husi Asembleia Jerál Nasaun Unida, nu’udar Loron Internasionál Direitu Umanu nian.
Prémiu sira-ne’e fó iha kategoria rua (2) ne’ebé diferensa mak Iha Direitu Sivíl no Polítiku, ne’ebé fó ba indivíduu no organizasaun sira-ne’ebé fó kontribuisaun notável ba promosaun no protesaun direitu sivíl no polítiku sira iha nasaun.
Lategoria seluk mak Iha Direitu Ekonómiku, Sosiál no Kulturál, no ida-ne’e atribui ba sira-ne’ebé mak fó ona kontribuisaun signifikativu ba promosaun no defeza Direitu Ekonómiku, Sosiál no Kulturál.
Reprezentante Manán-Na’in ba premiu ne’e, Me. Leonia Manalu, FCJM ne’ebé tau matan ba Orfonato iha Munisípiu Vikeke ne’e hato’o agradesementu ba Maromak no ema hotu nia apoiu ikus sai nu’udar vensedór ba prémiu referida.
“Ho Maromak nia grasa no forma hotu mak fó ba ha’u, komesa husi ha’u hela iha Timor-Leste, ha’u la hanoin atu hetan prémiu ne’e. Ha’u-nia atividade kada loron mak tau matan ba labarik orfonatu sira hodi prepara sira-nia moris ba aban bai-rua nian,” Me. Leonia hateten.
Bazea ba Dekretu-Lei Númeru 15/2009, loron 18 fulan-Marsu, vensedor ida-idak simu sertifikadu no prémiu osan hamutuk $10,000.
Notísia Relevante: Promotor-Defensór Direitu Umanu na’in-5 manán Prémiu Sérgio Vieira de Mello
Jornalista : Hortencio Sanchez
Editór : Cancio Ximenes
