DILI, 10 Dezembru 2025 (TATOLI)—Prezidente Repúblika, José Ramos-Horta, hateten nia parte hato’o ona pedidu ba prezidente foun Mosambike Daniel Francisco Chapo atu loke sira-nia embaixada iha Timor-Leste.
“Ha’u hato’o ona pedidu ba Prezidente Mosambike foun, mak ne’e, tenke loke Embaixada Mosambike iha Timor-Leste, labele iha de’it Jakarta,” Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite, kuarta ne’e.
Nia dehan, ho relasaun diplomátika ne’ebé di’ak, tempu ruma Mosambike sei harí nia embaixada iha Timor-Leste hanesan mós nasaun membru Komunidade Nasaun Sira Ko’alia Lian Portugés (CPLP-sigla portugés) seluk.
“Tenke harí sira-nia embaxada hanesan mós ho Angola, Portugál, Brazíl, sira iha ona embaixada iha ne’e. Sira-ne’ebé seidauk loron ruma sei iha sira-nia embaixada atu fasilita servisu diplomasi entre nasaun sira ho di’ak,” nia dehan.
Tuir Xefe Estadu, relasaun bilaterál entre Timor-Leste ho nasaun hotu iha mundu importante tebes, atu nune’e bele ajuda no servisu hamutuk ba Timor-Leste nia dezenvolvimentu.
Jornalista : Hortencio Sanchez
Editór : Cancio Ximenes
