VIKEKE, 11 Dezembru 2025 (TATOLI)—Organizasaun Internasionál Adventist Development and Relief Agency (ADRA-sigla ingleza) iha Timor-Leste, Kinta ne’e, apoia mákina prodús ai-han animál no mákina prodús ahi-anar ba kooperativa neen iha Munisípiu Vikeke.
Reprezentante ADRA iha Timor-Leste, Dionísio Sarmento Alves, hateten distribuisaun ekipamentu produsaun ne’e atu tulun kooperativa sira-nia negósiu.
“Apoiu ekipamentu sira-ne’e sai hanesan motivasaun ida ba kooperativa sira no sai hanesan oportunidade ba ita-nia kooperativa benifisiáriu sira, atu kooperativa sira bele hakat tan pasu ida bá-oin hodi hadi’a sira-nia moris sai di’ak liután iha futuru,” Dionísio hateten iha serimónia distribisaun mákina ba kooperativa sira, iha Postu Administrativu Vikeke Vila.
Dionísio hatutan prezensa ADRA nian atu fó kontribuisaun ba dezenvolvimentu nasionál espesialmente iha Munisípiu Vikeke hodi hatutan liman-ain Governu lokál nian hodi lori apoiu sira bá to’o iha komunidade iha baze.
“Apoia sira-ne’e ita foku ba kooperativa neen, ne’ebé durante hetan ona formasaun oioin,” Dionísio haktuir.
Iha fatin hanesan, Reprezentante Prezidente Autoridade Munisípiu Vikeke, Cosme Sarmento agradese ba prezensa ADRA nian iha Munisípiu Vikeke ne’ebé ajuda tebes povu Vikeke, tanba ne’e autoridade prefere ADRA kontinua eziste iha Munisípiu Vikeke hodi lori programa kooperativa ba suku seluk ne’ebé seidauk estabelesidu.
“Atu motiva komunidade iha Munisípiu Vikeke, ha’u husu ba kooperativa neen ne’ebé ohin simu ekipamentu produsaun ne’e tenke jere ho di’ak no responsabiliza atu fó benefísiu ba kooperativa,” nia akresenta.
Nia enkoraja kooperativa sira nafatin iha vontade hodi hala’o atividade kooperativa nian no fó konfiansa ba-malu hodi lori kooperativa la’o bá-oin.
Aleinde ne’e, Prezeidente Kooperativa HAMIFOR, Mateus Soares sente kontente simu ekipamentu produsaun tanba bele ajuda kooperativa hodi hadi’a ekonomia.
“Ha’u sente kontente simu ekipamnetu sira-ne’e. Husi ekipamentu ne’ebé ami simu sei reforsa ami hodi halo produsaun hanesan ai-han ba animál, prodús ahi-anar hodi fa’an fali ba komunidade seluk,” nia tenik.
Entretantu, ekipamentu ne’e kompostu husi mákina pellet unidade tolu (3), mákina produsaun ahi-anar unidade neen (6) no kada kooperativa ida hetan ida.
Iha distribuisaun ekipamentu mákina produsaun pellet no ai anar ba kooperativa neen ne’e hetan akompaña husi xefe suku sira, diretór munisipál no membru kooperativa neen.
Jornalista: Vitorino Lopes da Costa
Editór: Xisto Freitas da Piedade
