DILI, 11 Dezembru 2025 (TATOLI)—Estudante sira husi EBF 9 de Setembru Tumin, Reziaun Administrativa Espesiál Oekusi Ambenu (RAEOA), kinta ne’e, hetan oportunidade estraordináriu enkontru ho Prezidente José Ramos-Horta iha Palásiu Presidensial Nicolau Lobato, Bairru Pite, Dili
Oportunidade ne’e, hanesan esperiénsia dahuluk ba sira banhira tama iha palásiu prezidensiál nia laran ho sentimentu emosionadu no esperansa.
Antes ne’e, estudante sira hetan konvite ofisiál husi Prezidente Repúblika ne’ebé konvida direta sira-ne’ebé hela liu iha área rurál iha Oe-Silo besik fronteira entre Timor-Leste no Indonezia hodi rona direta sira-nia difikuldade iha prosesu aprendizajen.
Iha salaun “Nicolau Lobato”, enkontru ida ho tempu liu oras ida, sala ne’e nakonu ho emosionadu tebes bainhira estudante ida naran Berta Sufa, ho matan-been, hato’o ninia prekupasaun kona-ba prosesu aprendizajen no situasaun moris defisíl ne’ebe sira enfrenta.
Nia haktuir kona-ba kondisaun inan-aman ne’ebé servisu barak iha to’os, sira-nia distánsia hela fatin do’ok kuaze la’o kilómetru neen (6) hodi la’o aim to’o sira-nia eskola fatin no falta fasilidade eskola nian.
“Ami presiza avó Prezidente nia tulun atu harii Eskola ida mai ami lai,” Estudante ida husi EBF 9 de Setembru Tumin, Reziaun Administrativa Espesiál Oekusi Ambenu (RAEOA), Berta Sufa hateten ba Prezidente José Ramos-Horta ho matan-been no halo halo ema hotu iha aula laran ne’e nonook lian laek.
Nia hatutan, intensaun sira mai hasoru Xefe Estadu ne’e atu husu tulun ba aman ansaun ne’e atu tulun no tau matan ba estudante sira iha área rurál ne’ebé enfrenta problema menus fasilidade eskola no prosesu aprendizajen iha saladeaula.
“Ami mai iha ne’e Presija avó Prezidenete nia tulun tanba iha ami-nia Eskola ne’e (nia nonook kleur triste ho matan been), exelensia Prezidente, ami sei lalakon atu estuda nafatin, tanba ha’u nia inan-aman sira mós servisu iha to’os maibé sira hakarak ha’u tenke eskola,” Berta Sufa hateten ho laran trsite.
Profesór ida husi EBF 9 de Setembru Tumin-RAEOA, Renato Unamet de Jesus, hato’o mós ninia sentidu profundu kona-ba primeiravés estudante rurál sira, simu konvite extraordináriu ne’e hodi enkontru ho Xefe Estadu.
Renato esplika, kondisaun limitadu sira no sei esforsu atu servisu hamutuk ho Gabinete Prezidénsia Repúblika hodi buka solusaun ba Eskola referidu.
“Ami hetan Konvite diretamente husi nai Prezidente Repúblika. Ohin husi ami-nia estudante sira hato’o buat ne’ebé mak ami sente iha área rurál ne’ebá, fasilidade sira-ne’ebé ami sente la konfortavel, infraestutura no problema barak ne’ebé ami-nia estudante sira hasoru iha área rurál no ami hato’o ba prezidente atu koko servisu hamutuk liuliu ba parte relevante sira hodi hatán ba nesesidade sira-ne’e,” Renatodehan.
Entretantu, Prezidente Repúblika José Ramos-Horta, fó kompromisu klara katak Prezidénsia sei hadi’a eskola refere, halo asrama, haree kondisaun haris-fatin no fó apoiu transporte ba estudante sira-ne’ebé hela do’ok.
Xefe Estadu mós hateten, Prezidénsia sei fasilita estudante balun ne’ebé hakarak hela iha Asrama Dili, kolabora ho Profesór sira atu halo transferénsia ba estudante atu labele lakon prosesu aprendizajen no Prezidénsia prontu atu fó mós apoiu mensál ba sira.
“Problema hanesan ne’e la’ós deit iha Oekusi, maibé iha nasionál tomak. Prezidénsia kontínua hadi’a Eskola sira iha área rurál, konstrui uma ba komunidade vulnerável sira-ne’ebé kondisaun defisil tebes,” Horta hateten.
Jornalista : Hortencio Sanchez
Editór : Cancio Ximenes
