VIKEKE, 11 Dezembru 2025 (TATOLI)—Ministériu Adiministrasaun Estatál (MAE) liuhusi Diresaun Arkivu Nasionál Jestaun Dokumentál ho Sistema Arkivu, Kinta ne’e, fasilita formasaun lideransa ho tema “Formasaun Profisionál ba Kargu Xefia hodi Reforsa Kapasidade Funsionamentu Servisu Lokál iha Nivel Munisipál no Kontribui ba Governasaun Ne’ebé Efetivu” ba kargu xefia sira iha Munisípiu Vikeke.
Diretór Arkivu Nasionál Jestaun Dokumentál ho Sistema Arkivu, Elizeu Ângelo da Costa Soares, haktuir formasaun profIsionál ne’e importante ba kargu xefia sira tanba sira mak sai hanesan matadalan ba desentralizasaun no podér lokál.
“Baze legál sira-ne’e importante ita tenke hatene, tanba ida-ne’e mak guia ita ba podér lokál no ba implementasaun desentralizasaun iha futuru,” Elizeu hateten iha abertura formasaun, iha Salaun Laline Munisípiu Vikeke.
Nia dehan, matéria sira-ne’ebé sei disemina iha loron dahuluk mak hamutuk neen (6), hanesan Dekretu-Lei Nú. 33/2025, 15 Outubru, alteradu husi Dekretu-Lei Nú. 3/2017, 22 Marsu kona-ba regime das zonas de estacionamento de duração limitada, Dekretu-Lei Nú. 34/2025, 15 Outubru, alteradu husi Dekretu-Lei Nú. 84/2023, 23 Novembru kona-ba Estatuto das Autoridades Municipais e do Grupo Tecnico Interministerial para a Desentralizasaun Administrativa, Jestaun Lideransa no Boa Governasaun, Jestaun Risku (Risk Management) no Problem Solving, Jestaun Administrasaun no Korrespondénsia, Sistemátika Prepara Minutas Enkontru, Relatóriu no Jestaun Arkivu.
Elizeu aprofunda, liuhusi formasun sira-ne’e atu eleva liután koñesimentu ba kargu xefia sira atu hala’o servisu labele hakfodak.
Iha fatin hanesan, Prezidente Autoridade Munisípiu (PAM), Francisco C. S. de Gonzaga Soares, husu ba diretór no kargu xefia sira atu partisipa másima iha formasaun referida.
“Tanba matéria sira-ne’ebé sei partilla ne’e sai hanesan refreshing training ida ba ita, atubele ajuda kargu xefia sira hodi reforsa kapasidade funsionamentu hodi hala’o servisu, liuliu preparasaun ba simu desentralizasaun no podér lokál iha Munisípiu Vikeke,” nia hato’o.
PAM Vikeke agradese ba ekipa MAE ho Diretór Arkivu Nasionál Jestaun Dokumentál ho Sistema Arkivu ne’ebé partilla ona informasaun ba kargu xefia sira.
Formasaun referidu nu’udár Planu Asaun Anuál (PAA) servisu Munisipál Administrasaun Rekursu Umanu Vikeke hodi fasilita formasaun ba kargu xefia sira, kompostu husi Diretór Servisu Munisipál, Administradór Postu Administrativu, Xefe Departamentu Servisu Munisipál no postu sira no formasaun ne’e durante loron rua.
Jornalista: Vitorino Lopes da Costa
Editór: Xisto Freitas da Piedade
