ME planeia prodús kaderneta foun tuir kurríkulu terseiru siklu iha 2026
DILI, 11 Dezembru 2025 (TATOLI)—Koordenadór Gabinete Kurríkulu Unidade Nasionál Ministériu Edukasaun (ME), João Maupelu hateten ME iha planu prodús kaderneta foun tuir kurríkulu terseiru siklu ne’ebé sei implementa iha 2026.
“Kaderneta foun ne’ebé ita planeiu prodús iha 2026 ne’e tuir kurríkulu foun ne’ebé sei implementa iha 2026, ne’ebé hamutuk 32.000,” Maupelu hateten ba TATOLI iha resintu ME, Vila-Verde, Dili, Kinta ne’e.
Tuir Koordenadór Kurríkulu katak estudante segundu siklu ne’ebé ramata iha tinan ne’e besik rihun 30.
“Entaun, ita prodús rezerva mak presiza kaderneta rihun 32. Tanba ita hakarak rai rezerva kaderneta 2.000 ne’e ba estudante pasa hosi segundu siklu bá terseiru siklu,” nia dehan.
Maupelu informa prosesu produsaun ne’e Diresaun Kurríkulu koordena ho Diresaun Impresaun Nasionál Komoro hodi prodús.
“Impresaun ba kaderneta foun ne’e ita sei halo koordenasaun ho Sentru Impresaun Nasionál Komoro tanba Impresaun Nasionál tinan ne’e halo produsaun hotu ona no planu halo akizisaun foun iha tinan oin,” nia akresenta.
Kona-ba orsamentu, Maupelu esplika, Ministériu Edukasaun liuhusi Diresaun Nasionál Kurríkulu prepara de’it materiál ba produsaun kaderneta.
Jornalista: Osória Marques
Editór: Xisto Freitas da Piedade
