KOVALIMA, 11 Dezembru 2025 (TATOLI)- Servisu Munisipál Água Saniamentu no Ambiente (SMASA) nota Grupu Maneja Fasilidade (GMF) ba sistema bee-moos ladun funsiona ho di’ak tanba seidauk iha konsiénsia.
“Ita estabelese sistema bee-moos hahú 2011 to’o ohin loron no hodi forma mós GMF, maibé ladun la’o ho di’ak, nune’e bainhira bee avaria ruma difisil atu rezolve, tanba laiha orsamentu atu halo manutensaun”, Diretór SMASA Angelino Henrique, relata ba TATOLI, iha Bairru-Kosta, ohin.
Dirijente ne’e esplika katak SMASA forma GMF Bazeia baze legál Dekretu-Lei númeru 4/2004 inspesaun sistema bee-moos iha àrea presiza forma grupu Maneja Fasilidade (GMF) forma estrutura, nia regulamentu sansaun ho kliente sira deside tarefa kada-fulan kontribui $0,25 ka $0,50 maibé ladun la’o.
Razaun GMF ladun la’o, tanba komunidade sira seidauk iha konsénsia atu kontribui taxa halo manutensaun sistema bee-moos iha ida-idak nia suku bainhira instalasaun sistema bee-moos avaria.
Bazeia ba observasaun ne’e, Dirijente SMASA hala’o enkontru hodi fó hanoin kona-bá instalasaun sistema bee-moos hafoin finaliza no entrega ba komunidade sira maka jere no halo manutensaun tanba ne’e mak forma GMF.
Tuir dadus SMASA forma ona GMF 82. Husi númeru ne’e konsege halo ona re-estrutura GMF 38 maka funsiona no GMF 44 presiza kontinua halo re-estrutura, nune’e bele ativa kontrola sistema bee-moos iha área rural.
Instalasaun bee-moos ba komunidade-sira iha àrea ruràl hanesan sistema bee-mos grafitasaun, bomba eletrisidade ne’ebé hodi kria torneira jerál kada uma-kain 10 hetan torneira ida la’os ba kada uma kain.
Jornalista :Celestina Teles
Editór :Florencio Miranda Ximenes
