DILI, 11 Dezembru 2025 (TATOLI)—Negosiasaun delimitasaun fronteira maritima segunda ronda ne’ebé hala’o iha Jogjakarta, iha 10 Dezembru ne’e, lori satisfasaun ba ekipa negosiadór husi Timor-Leste ho Repúblika Indonézia tanba konsege ko’alia ba malu ho di’ak hodi simu ideia no iha vontade atu avansa ba etapa tuir mai.
Notísia Relevante: TL-Indonézia sei hahú reuniaun formál negosiasaun fronteira marítima iha Dezembru
Primeiru-Ministru, Kay Rala Xanana Gusmão, observa durante prosesu negosiasaun delimitasaun fronteira maritima iha ronda daruak ne’e ekipa husi parte rua hatudu vontade boot ne’ebé hakarak tebe-tebes atu rezolve duni fronteira marítima rai rua nian.
“Ha’u labele ko’alia buat bara-barak tanba formalmente ita foin hahú agora iha Jogjakarta. Ne’e duni, ha’u espera katak negosiasaun tuir mai iha fulan-Abríl 2026 no tinan oin sei bele dehan buat ruma. Ha’u labele dehan ha’u kontenti tebes maibé satisfeitu tanba ita haree katak ita bele ko’alia bá malu, bele simu ideias bá malu. Ida-ne’e mak prinsípiu di’ak ida iha negosiasaun ne’ebé difísil kona-bá fronteira marítima,” Primeiru-Ministru hateten iha The Phoenix Hotel, Jogjakarta, Indonézia, kuarta (10/12/2025).
Lembra katak negosiasaun formál primeira ronda hala’o iha fulan-Agustu 2025, iha Dili no segunda ronda hala’o iha Jogjakarta. Ekipa konkorda ona atu kontinua negosiasaun formál tuir-mai iha fulan-Abríl 2026.
“Durante loron-rua ho balun ne’e diskusaun la’o di’ak, ho abertura husi parte Indonézia lidera husi Embaixadór Amrih. Ita senti katak iha abertura, iha kooperasaun, iha duni vontade hosi Governu Indonézia atu rezolve ita-nia fronteira maritima,” Xefe Governu subliña.
Enkuantu negosiasaun formál segunda ronda kona-bá Fronteira Marítima iha Jogjakarta hala’o durante loron-tolu hahú husi loron 08-10 Setembru 2025 no taka ho asina akta husi Xefe delegasaun nasaun rua nian.
Timor-Leste asina hosi atuál Diretora Ezekutiva Gabinete Fronteira Terestre no Marítima (FTM), Elizabeth Exposto no husi Indonézia asinah hosi Diretór Jerál Asuntu Jurídiku no Tratadu Internasionál sira, Ministériu Negósiu Estranjeiru, Embaixadór L. Amrih Jinangkung.
Entretantu, iha serimónia asinatura akta ne’e ekipa husi Timor-Leste entrega tais, kafé Timor ho livru bá xefe delegegasaun Indonézia nian no foto hamutuk.
Jornalista : Alexandra da Costa
Editór : Cancio Ximenes
