DILI, 11 Dezembru 2025 (TATOLI)—Prezidente Repúblika José Ramos-Horta, kinta ne’e, hala’o enkontru ho delegasuan ida husi Parlamentár Portugál hodi diskute kona-ba relasaun billaterál nassun rua nian, iha Palásiu Prezidensiál Nicolau Lobato, Bairru Pite, Dili.
Reprezentante Parlamentár Portugál, José Cesário, hateten enkontru ne’e foka liu ba hametin kooperasaun bilaterál no knaar Timor-Leste nian iha kontestu rejionál no internasionál, iha ámbitu esforsu hodi aprofunda lasu istóriku no estratéjiku entre nasaun rua ne’e liuliu kona-ba integrasaun país nian iha Asosiasaun Nasaun Sudeste Aziátiku (ASEAN).
Nia hatutan, inisiativa ba vizita ne’e mai husi bankada parlamentár portugeza rasik, ho objetivu atu konsolida parseria ida-ne’ebé metin ona sai metin liután.
“Ami iha ne’e reprezenta Asembleia Repúblika Portugál, atu hato’o ba Prezidente ami-nia vontade atu kolabora iha matéria hotu-hotu ne’ebé relasiona ho objetivu Timor-Leste nian, ninia dezenvolvimentu no ninia relasaun ho Portugál. Ideia ba vizita ne’e mai husi ami, atu hametin kooperasaunm” Deputadu Portugál José Cesário hateten.
Nia hateten, prezensa hosi kultura portugés no lian portugés sai nafatin hanesan prioridade boot ida ba Portugál, konsidera ida-ne’e hanesan aspetu ida-ne’ebé espesífiku tebes ne’ebé merese iha atensaun espesiál.
“Koperasaun hanesan importante tebes no hala’o ona ho intensivu no ativu iha setór seguransa, defeza, edukasaun, kultura, justisa no parlamentar,” nia hateten.
Nia destaka, apoiu diretu husi Embaixada Portugál iha Dili no husi misaun diplomátika Timor-Leste nian iha Lisboa hodi hametin liután relasaun bilaterál sira.
Nia dehan, importánsia husi komunidade portugés ne’ebé hela iha Timor-Leste no timoroan sira ne’ebé hela iha Portugál, ne’ebé kontinua hala’o papél fundamentál hodi hametin relasaun entre nasaun rua ne’e.
Jornalista : Hortencio Sanchez
Editór : Cancio Ximenes
