Xefe Estadu-Ministru Bendito diskute situasaun polítika ne’ebé Giné-Bissau enfrenta
DILI, 11 Dezembru 2025 (TATOLI)—Ministru Negósiu Estranjeiru no Kooperasaun (MNEK), Bendito Freitas, kinta ne’e, iha Palásiu Prezidensiál Prezidente Nicolau Lobato Dili, hasoru malu ho Prezidente Repúblika José Ramos-Horta hodi diskute situasaun polítika ne’ebé Giné-Bissau enfrenta.
Ministru Negósiu Estranjeiru no Kooperasaun (MNEK), Bendito Freitas, informa mós ba Prezidente Repúblika kona-ba iha loron 05 fulan-Dezembru reuniaun Konsellu Ministru CPLP ne’ebé hala’o virtuál ko’alia liu kona-ba situasaun Giné-Bissau nian, no enkontru virtuál ne’e la permite atu proklama rezultadu eleisaun demokrátiku iha Giné-Bissau tanba mosu golpe Estadu.
“Iha ne’ebá sai preokupasaun boot ba Estadu membru CPLP nian, ida-ne’e mak konvoka reuniaun Konsellu Ministru extraordinariu hodi debate asuntu ne’e,” Ministru Bendito hateten ba jornalista sira hafoin remata enkontru ho Xefe Estadu.
Governante ne’e dehan, durante reuniaun Konsellu Ministru extraordinariu CPLP nian diskute asuntu rua mak ida Ministru Negósiu Estranjeiru husi nasuan CPLP sira propoin atu iha misau nivel aas ida atu dezloka urjente ba Guiné-Bisaun hodi haree situasaun referida.
Husi proposta ne’ebé Estadu membru CPLP sira hato’o hakarak Prezidente Repúblika José Ramos-Horta mak sai hanesan Xefe misaun.
“Depois nasuan Membru sira akompaña hanesan Angola, São Tome e Principe, maibé kestaun ne’e ultima ora, ita-nia Prezidente iha ajenda lubuk ida no labele sai Xefe misaun ne’e. Nune’e mak ita prefere asuntu xefia ba misaun nivel aas ne’e mak Angola ho São Tome e Principe ou nasaun membru seluk bele lidera misaun ne’e, depois Timor-Leste integra hodi tama iha delegasaun ne’e,” nia dehan.
Tanba ne’e, foin lalais Governu liuhusi Konsellu Minustru deside ona katak membru Governu na’in-rua mak sei integra tama iha misaun ne’e. Membru Governu rua ne’e mak, Ministru Administrasaun Estatál (MAE) no Ministru Defeza (MD).
Bainhira misaun ne’e remata CPLP sei realiza simeira nivel Xefe Estadu, Xefe Governu atu bele halo analiza kona-ba situasaun ne’ebé akontese iha Giné-Bissau.
Jornalista : Hortencio Sanchez
Editór : Cancio Ximenes
