Atleta timoroan Zaquelino Monteiro oferese medalla bronze ida ba TL
DILI, 12 Dezembru 2025 (TATOLI)—Atleta timoroan husi modaliade Kulturizasaun, Zaquelino da Costa Monteiro, konsege oferese medalla bronze ida ba Timor-Leste bainhira partisipa iha eventu kampeonatu mundiál Kulturizasaun Held Batam, Indonézia foin lalais ne’e.
Prezidente Federasaun Kulturizasaun Timor-Leste (FBBTL), Anastacio da Costa, ho nia atleta sira, sesta ne’e, iha Palásiu Prezidensiál, Prezidente Nicolau Lobato Dili, hasoru malu ho Prezidente Repúblika José Ramos-Horta hodi fó sai kona-ba susesu husi atleta ne’ebé konsege fó vitoria ba Timor-Leste iha jogu referidu.
Anastacio haktuir, kompetisaun ne’ebé hala’o iha loron 11-17 fulan-Novembru 2025 atrai partisipasaun husi nasaun 42 inklui Timor-Leste.
“Iha ami-nia enkontru ho Prezidente Repúblika, ami aprezenta rezultadu kompetisaun mundiál ne’ebé ami partisipa ho Federasaun Kulturizasaun iha Batam, Indonézia. Ami fahe mós rezultadu no prosesu harii Federasaun ba ita-nia Prezidente,” Anastacio hateten.
Nia hatutan, Federasaun lori atleta na’in-tolu (3) ba kompetisaun ne’e ne’ebé kompostu husi mane na’in-rua (2) no feto na’in-ida (1).
“Atleta na’in-tolu (3) ne’e, mane ida (1) no feto ida (1) iha kategoria Fisikultura nian, alkansa pozisaun da-neen no mane ida (1) seluk manán medalla bronze ida (1), tanba hetan pozissun da-tolu,” nia dehan.
Nia esplika, molok lori atleta sira ba tuir kompetisaun, Federasaun hala’o prosesu selesaun ikus mak hili atleta na’in-tolu (3) hodi ba tuir kompetisaun ne’e.
Ho nune’e, Prezidente Ramos-Horta hato’o nia apresiasaun no orgullu ba vitória FBBTL nian ba Timor-Leste no konsidera atleta sira nu’udar diplomata Timor-Leste nian, hodi promove nasaun ne’e iha rai-li’ur.
Iha fatin hanesan, Fisikulturista, Esmeralda Ximenes, espresa ninia ksolok hodi partisipa iha kompetisaun ne’e.
“Pesoalmente, ha’u kontente tebes hodi kompete. Maske iha dezafiu barak ne’ebé hasoru iha treinu, haree ba tempu ne’ebé badak, ami entuziazmu nafatin,” Esmeralda hateten.
Jornalista : Hortencio Sanchez
Editór : Cancio Ximenes
