DILI, 12 Dezembru 2025 (TATOLI)—Dosente Fakuldade Enjeñaria, Siénsia no Teknolojia Universidade Nasionál Timor Lorosa’e (UNTL), Joviano António da Costa eleitu sai Reitór UNTL ba períodu 2026-2031 substitui Reitór Atuál João Soares Martins.
Joviano eleitu ho votu sia (9) hafoin vense ninia rivál na’in-rua seluk hanesan Samuel Venâncio de Sousa Freitas ho votu rua (2) no Cristóvão dos Reis hetan votu neen (6), iha eleisaun volta daruak ne’ebé hala’o iha Auditoria Fakuldade Enjeñaria, Siénsia no Teknolojia Hera, Postu Kristu Rei, Dili, 12 Dezembru 2025.
Antes ne’e, rejistadu kandidatu hamutuk 12 maibé iha faze audisaun públika no eleisaun, kandidatu 11 de’it mak konkorre, entretantu kandidatu Rosalino Gomes la partisipa tanba hala’o hela serbisu iha diáspora.
Kandidatu hamutuk 11 ne’ebé kompete malu mak hanesan:
1. Acácio Cardoso Amaral, Ph.D.
2. Afonso de Almeida, Ph.D.
3. Aurélio Sergio Guterres, Ph.D.
4. Brígida Antónia Correia, Ph.D.
5. Constâncio António Pinto, Ph.D.
6. Cristovão dos Reis, Ph.D.
7. Eduardo Aniceto Serrão, Ph.D.
8. João Soares Martins, Ph.D.
9. Joviano António da Costa Ph.D.
10. Martinho Borromeu, Ph.D.
11. Rosalino Gomes, Ph.D. (la tuir).
12. Samuel Venâncio de Sousa Freitas, Ph.D.
Iha eleisaun dahuluk, kandidatu hirak-ne’e la hetan votu absoluta. Nune’e, kandidatu tolu mensionadu iha leten ne’ebé hetan votu boot tutuir malu avansa bá volta daruak.
Liuhusi nia deskursu, Reitór UNTL Eleitu, Joviano António da Costa agradese dahuluk ba Maromak no agradese mós ba Konsellu Jerál ne’ebé fó konfiansa ba nia hodi lidera UNTL.
Nia hateten sai reitór la’ós ba fakuldade no la’ós mós ba dekanu, maibé hamriik iha-ne’e ba UNTL tomak.
“Ha’u la’ós ona na’in ba Fakuldade Enjeñaria maibé ha’u sei na’in ba UNTL ne’ebé kompostu husi fakuldade sanulu (10). Tanba ne’e, agradese ba estrutura sesante no komprometidu sei kontinua saida mak iha ona. Ba buat di’ak ne’ebé ita-boot halo, ha’u sei kontinua. Ba buat balun ne’ebé ladi’ak, ida-ne’e ha’u-nia obrigasaun atu hadi’a,” nia subliña.
Nia promete katak nia sei esforsa aan atu lori UNTL ba futuru ida-ne’ebé eselente.
“Ha’u sei la la’o mesak maibé sei serbisu hamutuk ho estrutura atu hadi’a UNTL sai universidade ne’ebé kualidade no eselente hanesan ho universidade sira seluk iha mundu liuliu iha Asosiasaun Nasaun Sudeste Aziátiku (ASEAN-sigla ingleza),” nia deklara.
Atu atinje kompromisu ida-ne’e, Joviano informa nia sei eleva kualidade rekursu umanu, infraestrutura, kooperasaun nasionál no internasionál.
Iha parte seluk, Ministru Ensinu Superiór, Siénsia no Kultura, José Honório da Costa Pereira Jerónimo, hateten nia laiha preferénsia ba kandidatu reitór 12 tanba sira mesak doutór no timoroan hotu ne’ebé mesak di’ak de’it. Depende ba Konsellu Jerál atu hili ida-ne’ebé di’ak no hanoin sira na’in-12 mesak kandidatu forte ba UNTL.
“Reitór foun ba UNTL koordena no servisu nafatin ho Ministériu Ensinu Superiór atu halo servisu ne’ebé di’akliu ba andamentu UNTL nian,” nia dehan.
Joviano nia antesedénsia estudu nu’udár lisensiadu iha área Enjeñaria Mekánika iha Malang, Indonézia, Mestradu iha área Enjeñaria Mekánika iha Nagahoka University, Japaun no doutoradu iha área ida-ne’e (Mekánika) iha Universidade do Porto, Portugál.
Iha tinan 2024, eleitu nu’udár Diretór Kursu Mestradu Enjeñaria iha UNTL, apoiadu husi Japan International Cooperation Agency (JICA).
Antes eleisaun, UNTL liuhusi Konsellu Jerál realiza audisaun públika durante loron rua (11-12 Dezembru).
Objetivu husi audiénsia públika ne’e, atu fó oportunidade ba kandidatu sira hodi halo aprezentasaun ba programa, planu no asaun durante mandatu ba tinan 2026-2031 nian.
Durante loron rua ne’e, kandidatu na’in ualu mak halo aprezentasaun iha loron dahuluk no loron daruak kandidatu na’in tolu mak halo aprezentasaun iha parte dadeer no parte lokraik hala’o eleisaun husi Konsellu Jerál.
Jornalista: Osória Marques
Editór: Xisto Freitas da Piedade
