DILI, 12 Dezembru 2025 (TATOLI)–Ministru Ensinu Superiór, Siénsia no Kultura (MESSK), José Honório da Costa Pereira Jerónimo hamutuk nia Institutu tuteladu, Sesta ne’e, lansa pontu importante tolu hodi garante kualidade ensinu superiór iha futuru.
“Ohin ita halo lansamentu ba buat importante tolu. Ida mak baze dadus ba ensinu superiór, nune’e iha país seluk ema bele loke no hatene ita-nia universidade no institutu superiór hira, dosente no estudante hira no kursu saida mak eziste iha ita-nia ensinu superiór,” Ministru Honório dehan ba jornalista sira, hafoin komemora Loron Mundiál Siénsia ba Pás no Dezenvolvimentu, Ministériu Negósiu Estranjeiru no Kooperasaun (MNEK).
Governante ne’e subliña Timor-Leste iha universidade no institutu superiór hamutuk 19, tanba ne’e presiza iha baze dadus hodi bele hafásil ema hodi asesu ba dokumentu.
“Segundu, ita lansa revizitóriu ba peskiza. Nune’e, peskiza hosi INCT bele tau iha revizitóriu nasionál. Sei loke ba públiku hodi futuru ema hotu bele haree no sai hanesan armazein importante ida ne’ebé dijitál hodi rai hela ba jerasaun sira tuirmai. Pontu terseiru mak ita ko’alia ho UNESCO hodi iha Komisaun Nasionál ba Étika Peskiza. Tanba kuandu peskiza tenke iha étika,” nia akresenta.
Nune’e mós, Prezidente Institutu Nasionál Siénsia no Teknolojia, José Cornélio Guterres, hateten ohin lansa projetu Depozitór Dijitál Nasionál no Komisaun Nasionál Peskiza ba Étika.
“Depozitór Dijitál Nasionál hanesan biblioteka ida, maibé biblioteka nasionál seidauk eziste ne’ebé ita bele armazena rezultadu sientífiku sira, ita bele tau iha-ne’ebá hodi públiku bele asesu. Aleinde ne’e, promove ita-nia dosente ne’ebé halo peskiza ba siénsia,” José tenik.
Nia hatutan peskizadór ida halo peskiza ba siénsia nia tenke iha étika peskiza. Ne’e importante tanba nune’e bele avalia kada peskizadór nia aprezentasaun ba siénsia.
Partisipa iha lansamentu ne’e hosi MESSK nia tuteladu hanesan Universidade Nasionál Timor Lorosa’e (UNTL), Institutu Politékniku Betanu (IPB), Institutu Nasionál Siénsia Teknolojia (INCT) no Ajénsia Nasionál Avaliasaun Akreditasaun Akadémika (ANAAA) inklui UNESCO iha Timor-Leste.
Jornalista: Osória Marques
Editór: Xisto Freitas da Piedade
